Á ferð og flugi

Nýtt hjól!!

2009-09-19T22:04:00.002Z

Ég er búin að vera kreisí spennt í allan dag :) Ég hafði samband við konu sem var að selja hjólið sitt. Hún hins vegar býr nokkuð langt frá en það vildi svo vel til að Sandra og Krissi voru að fara til Randers sem er bara ca. 6km. frá þeim stað sem hjólið mitt var á. Þau voru svo góða að bjóðast til þess að sækja það fyrir mig. Ég er búin að vera í sms sendingum við konuna síðan í gærkvöldi sem er búin að vera alveg ótrúlega skemmtileg og hress. Hún meira að segja sendi mér sms og lét mig vita að Sandra og Krissi væri nýfarin með hjólið :) Sé mest eftir því að hafa ekki fengið að hitta hana sjálf til að sjá hvort hún væri jafn hress og hún virtist!

Hjólið mitt er eiginlega alveg eins og ég sýndi á mynd fyrir neðan (af öðru hjóli sem ég fékk ekki). Ég er svo ánægð með það að ég er viss um að ég tími ekki að selja það aftur eftir veturinn ;) Held ég hafi aldrei átt svona alvöru stelpuhjól. Ég fór meira að segja í Tiger líka að kaupa mér hjálm svo ég er "all set".

Í kvöld hjóluðum við Herdís og Sara (sem er au-pair hér) í bíó. Þetta var í fyrsta skipti sem við allar hjóluðum í bíó. Ótrúlegt samt hvað fólk er mikið á hjólum hér og hvað er alveg ótrúlega troðið á öllum hjólastæðum. Danir eru líka alveg undrandi á því að það sé ekki hjólað mikið á milli staða á Íslandi. "Why not?"

Ég hef annars ákveðið að kíkja heim til Íslands í október. Þá er haustfrí og gott að geta nýtt tímann til að fara aðeins heim. Afi minn lést líka síðastliðinn þriðjudag en jarðarförin verður ekki fyrr en ég kem heim, sem mér finnst rosalega gott. Finnur bróðir kemur líka og Anna Sólrún svo það verður fjörugt í húsinu :)

Fögur er sveitin ;)

2009-09-10T20:06:00.003Z

Eftir skóla í dag var ég búin að ákveða að kíkja í IKEA að kaupa eitthvað smávægilegt til að klára vegginn sem ég er að byggja (#sungið# Steinunn byggir, dúdúrú #). Herdís var svo skemmtileg að veita mér félagsskap á leiðinni og við hoppuðum tvær inn í strætó nr. 3. Hann fer í IKEA. Sennilega eina sem ég veit almennilega um strætóana hér ;)

Þetta varð þó aðeins ævintýralegri ferð en við áttum von á! Þegar við erum búnar að keyra í 10-15 mín sé ég IKEA á hægri hönd (sem er óvanalegt). Ég fór að velta fyrir mér að strætó væri nú að fara óvenjulega leið miðað við seinast þegar ég tók strætó þangað, en hann hljóti bara að taka einhvern hring. ...svo keyrir strætó bara frá IKEA og tekur engan hring. Við Herdís lítum hvor á aðra... Ákveðum að sitja samt um kyrrt, strætó hlýtur að snúa við á endanum. Það var ekkert voðalega gáfulegt því hann keyrði bara lengra og lengra. Á endanum fara allir út og strætóbílstjórinn segir að hér verðum við að fara líka. Jæja, við höfðum þá fengið að sjá aðeins sveitina á Jótlandi... svona þannig. Við vorum komnar til Trige, 12 km frá Århus og 40 mín bið í næsta strætó. Við nenntum ekki að bíða þannig að við löbbuðum í IKEA ca. 6km og vorum næstum komnar þegar strætó keyrði framhjá. Gengum á hjólaveginum því það var enginn gangstétt. Svakalegur dugnaður. Vöktum þó mikla athygli ökumanna sem við mættum.

Ég komst að því að danir taka bara framúr þó það sé bíll á koma á móti. Vegirnir eru það breiðir að þeir gera komast alveg þrír fyrir hlið við hlið svo þeir nýta sér það bara. Sá þetta alveg nokkrum sinnum á leiðinni, einn að taka framúr og mætir um leið bíl að koma á móti. Mér var ekki alveg sama. Sennilega ekkert svakalega gáfulegt að rölta svona meðfram sveitavegunum.

Eftir IKEA innkaupin og skyldu-IKEA-pylsuna þurftum við að bíða í 40 mín eftir strætó og vorum ekki komnar heim fyrr en hálf 9. Þess vegna er ég ennþá vakandi, er ekki alveg að átta mig á að klukkan er orðin hálf 2 hjá mér. Kannski ég ætti að koma mér í rúmið.... ætla aðeins að pæla í því ;)

"Your money is no good here"

2009-09-07T20:37:00.003Z

Úff, held að veðurguðir Árósa geti ekki ákveðið sig hvort það sé sumar eða haust. Dagurinn í dag var ótrúlega heitur og rakur.

Ég ætlaði loksins að láta verða að því að opna bankareikning. Eftir smá rannsóknarvinnu höfum við komist að því að sennilega er Vestjysk bank líklegast til að gefa okkur Dankort fljótlega svo ég rölti til þeirra í morgun. Neinei, ég gat ekki opnað bankareikning í dag því ég var ekki með bréf frá þjóðskrá Danmerkur með réttu heimilisfangi. Frábært! Ég hafði fengið kennitöluna mína meðan við bjuggum enn á gamla staðnum og er ekki búin að fá neitt nýtt í hendurnar með réttu heimilisfangi. Ég var frekar pirruð að hafa farið fýluferð útaf einhverju svona. Ég veit að heimilisfangið er orðið rétt í þjóðskrá því ég sé það á skráningunni í skólanum en nei, ég verð að vera með eitthvað asnalegt pappírssnifsi. Skilríki með mynd og staðfesting á kennitölu er ekki nóg. ...ein vel pirruð ;) Held þeir vilji ekki peningana mína.

Annars fann ég hjól eins og mig langar í, ódýrt í Skanderborg sem er bara í korters fjarlægð í lest. Ég krossa fingur að það seljist ekki áður en ég heyri í seljandanum. Það er samt frekar ólíklegt miðað við hvað hann ætlar að selja það ódýrt en það má alltaf vona ;) Reyndar ljósbleikt en ég held ég ætti að lifa það af ;)

B.t.w. ég skildi meira í tíma í dag :D Enda var annar kennari sem stoppaði í byrjun fyrirlestrar og spurði hvort hún ætti ekki að tala hægt. Hún hefði heyrt að það væru svo margir Íslendingar í hópnum (hún minntist ekkert á alla norðmennina sem eru 2-3 sinnum fleiri ;) ). Ég meira að segja hló að allavega tveimur bröndurum hjá henni. Haha, geri aðrir betur.

Heyrði það í dag að upphaf vikunnar (mán-þri) sé yfirleitt erfiðastir að skilja svo þegar líði á vikuna verði þetta auðveldara. Allavega þegar maður talar bara íslensku um helgar. Vonum að það sé rétt ;)

Við Sandra erum frekar óheppnar. Í fagi sem kallast Forskningsmetoden erum við í hóp 3. Þetta er víst í fyrsta sinn sem búnir hafa verið til 3 hópar í klíníska hluta þessa fags. Það er svosem bara fínt fyrir utan að við erum eini hópurinn sem þarf að mæta í miðju haustfríi í skólann. Það er skyldumæting í 80% af tímunum en það eru bara 5 tímar svo við verðum að mæta í 4. Ég sem hefði kannski getað kíkt í heimsókn heim í 12 daga. Það hefði verið næs. Spurning hvort maður láti reyna á 6 daga heimsókn... Hmmm væri gaman ;)

Rok og rigning

2009-09-04T22:17:00.002Z

Ég var alveg heldur fljót á mér að segja að ég skildi rosalega mikið... Kannski ekki alveg svo mikið ;) Við fórum í skólann í gær. Fyrst um morguninn var kynning á náminu og skólanum sem gekk bara fínt. Fyrsti tíminn var svo eftir hádegið. Ég skildi að sjálfsögðu voðalega lítið... næstum ekki neitt! Mér leið þó aðeins betur þegar ég frétti eftir tímann að danirnir áttu líka erfitt með að skilja hann. Hann talaði víst svo óskýrt. Það var þó hægt að lesa glærurnar hans og mér sýnist að þessi tími eigi eftir að vera mjög áhugaverður... svona um leið og ég fer að skilja karlinn aðeins betur :)

Dagurinn í dag var fyrsti haustlegi dagurinn með roki og rigningu. Ég er ansi hrædd um að ég hafi eyðilagt regnhlífina mína :S Það eru engir tímar föstudögum svo við sváfum bara frameftir, í fyrsta sinn í langan tíma! Það var ekkert smá næs. Við neyddumst samt til að fara í bæinn og leita okkur að neti til að panta okkur router. Við höfum nefninlega farið inn á opið net sem datt niður í gærkvöldi. Pöntunin gekk að vísu ekkert sérstaklega vel því danirnir eru ansi gjarnir á að vilja fá allt sem maður pantar skráð á dönsk símanúmer en við höfum ekki fengið það enn, því til þess þurftum við kennitölu sem við Herdís erum nýkomnar með og fáum símanúmerin eftir helgi. Þá var bara næst á dagskrá að finna Telenor búð og spjalla bara face-to-face við einhvern afgreiðslumanninn. Hann pantaði fyrir okkur netið og þrátt fyrir að hann segði að við yrðum að vera með kennitölu til að fá það þá tók hann aldrei niður kennitöluna mína... skrítið. Versta er að við þurfum að bíða í ca. 14 daga eftir neti! 14 daga!!!!! Sem betur fer eru danir eru ekkert smá hjálplegir því parið við hliðina á okkur bjó til gesta-aðgang fyrir okkur á netið þeirra meðan við bíðum eftir okkar neti. Þau meira að segja harðneituðu að taka við greiðslu frá okkur. Þetta sama fólk lánaði okkur líka borvél svo við gætum borað fyrir gardínum.

Veggirnir hér eru svo enn önnur saga! Þetta eru án efa hörðustu veggir sem ég hef kynnst. Við þurftum að bora 8 göt fyrir gardínum í íbúðinni. Það tók okkur 2 1/2 tíma að borga 2 göt og náðum reyndar aldrei að komast nógu langt með seinna gatið. Ég sver að borinn stóð í stað á seinna gatinu og við enduðum á að gefast upp. Lausnina fundum við svo í dag! Snilldarlausn! Sturtuhengi!! Í dag eru það sturtuhengi sem halda uppi gardínunum ;) Algjör snilld! Tek það fram að veggirnir voru meira að segja svo harðir að stálnaglarnir bognuðu þegar við reyndum að negla einn í vegginn. Held að við séum bara búnar að taka þá ákvörðun að ekkert verði hengt á vegginn! Ekki nema að við finnum fleiri sturtuhengi! ...djók ;)

Seinasta mál á dagskrá í bili er svo að stúka herbergið mitt af. Eftir langa, langa leit að einföldu skilrúmi sem bara virðist ekki fást lengur hef ég ákveðið að smíða mér skilrúm. Það er alls ekki svo dýrt og þá get ég líka bara ráðið hvað það er hátt og breytt :) ...held það sé nokkuð til í máltækinu að neyðin kenni naktri konu að spinna! ...og smíða ;)

Århus- 10 dagar liðnir

2009-09-02T07:24:00.002Z

Loksins! Loksins internet sem ég get notað... þegar ég vil!! :D

Við Einar komum fyrir 10 dögum og mættum í íbúðina sem okkur hafði verið reddað á seinustu stundu. Við fengum að vera þar í ágúst ef við myndum þrífa og svo ætlaði leigusalinn að gera við okkur samning. Fyrstu dagana vorum við bara með helminginn af því sem okkur bauðst og ekki heitt vatn í byrjun, en það var lagað. Ekki voru heldur lyklar til að íbúðinni sem ég var í en lyklar voru að herberginu við hliðina á. Þegar ég fór í þvottavélaleiðangur í grútskítuga kjallarann með öllum rottugildrunum (það höfðu verið rottur en voru ekki lengur... held ég) komst ég að því að sápuhólfið í þvottavélinni niðri var svart af skít! Ekki séns að ég myndi þvo fötin mín í svartri sápu svo ég gerði heiðarlega tilraun til að þrífa sápuhólfið. Það var enn brúnt þegar ég var búin að nudda og nudda. Það var rakalykt í íbúðinni sem maður reyndar vandist og var hættur að taka eftir þegar Sandra kom nokkrum dögum seinna. Hún fann hana að sjálfsögðu eins og skot. Þegar neðri hæðin losnaði fengum við að sjá öll herbergin og í einu voru rakaskemmdir í vegg og þar höfðu verið nokkrir köngulóavefir í hverju horni (sáum það rétt áður en fyrri leigjendur þrifu almennilega). Þá vorum við komnar í smá vandræði því við vorum ekki sáttar við þetta og vildum finna eitthvað annað.

Við vorum alveg fáránlega heppnar, fundum íbúð sem við gátum flutt inní strax í gær og fórum strax í að fá bíl og flytja allt draslið yfir! Þetta tókst á mettíma! 3 og 1/2 tími bara við stelpurnar því við erum víst orðnar karlmannslausar :'( Enda er ég að dreeeeepast í öxlunum og bakinu í dag. Þegar ég fór að sofa í gærkvöldi var eina sem eftir var af gömlu íbúðinni rakalyktin af sænginni minni... Held ég verði að þvo allt!

Skólinn byrjar víst ekki fyrr en á morgun hjá okkur Söndru en Herdís byrjar núna á eftir. Við eigum örugglega voða lítið eftir að skilja en það hlýtur að koma bráðlega. Ég er allavega farin að skilja flest sem er sagt við mig á dönsku og skildi alveg 90% af því sem sagt var þegar við vorum að skoða íbúðina, restina þýddi Sandra. Ég verð að setja myndir inn af íbúðinni við tækifæri... og ég lofa að næsta blogg verður ekki svona langt, er að reyna að segja bara það helsta ;) Ég er að vinna upp internetleysi síðustu 10 daga ;)

Minneapolis

2007-09-02T14:29:00.000Z

Lenntum eldsnemma á Minneapolis flugvelli. Við áttum að eyða deginum þar og höfðum við gert ráð fyrir að ef við gætum ekki tékkað töskurnar inn strax væru allavega skápar sem við gætum skilið töskurnar eftir. Það var að sjálfsögðu ekki vegna hryðjuverkahættu sem varð til þess að við við vorum föst á flugvellinum í 6 tíma að bíða eftir því að fá að skilja töskurnar við okkur. Eftir á var það kannski ágætt að sofa svoldið á flugvellinum enda vorum við vel þreytt. Ennþá nótt á okkar tímabelti (Kaliforníu tími) og lítið var sofið í flugvélinni milli SanFran og Minneapolis.
Þegar við loksins höfðum náð að losa okkur við töskurnar skruppum við í Mall of America sem er 5mín frá flugvellinum. Þetta er alveg ótrúlegt mall. Auðvitað með búðum og veitingastöðum en auk þess einhvers konar casínói, tívolíi og örugglega einhverju fleiru sem ég man ekki eftir. Á leiðinni út vorum við stoppuð af öryggisverði sem vildi fá að sjá skilríki. Þá mátti ekki vera í mallinu ef maður var yngri en 17 ára nema í fylgt með fullorðnum. Við vorum greinilega svona ungleg! Matti var náttúrulega með okkur en hann er 14ára en einhvern vegin fannst öryggisverðunum við Einar ekki vera nógu gömul til að fylgja honum (geri ráð fyrir að við þyrftum að vera 21árs).
Ferðin heim gekk annars bara mjög vel. Ásdís (mamma Matta) sótti okkur á flugvöllinn (með smá stoppi í tollinum) og skutlaði okkur heim. Ahhh, gott að komast loksins upp í rúm eftir rúmlega sólarhringsferðalag.

Seinasti dagurinn í Kaliforníu

2007-09-02T14:26:00.000Z

Sváfum lengi þennan dag, enda urðum við að safna upp svefni fyrir löngu ferðina heim. Finnur sótti okkur svo upp úr hádegi svo við gætum kíkt í hádegismat með honum í Google, úúúúú :D
Þegar í vinnuna hans var komið fundum við strax stæði og Finnur kom með þá snilldar setningu (svona ef maður pælir í hvað vinnan hans er flott): "Yes! Stæði! Venjulega neyðist ég til að fara með bílinn að aðalinnganginum og láta einhvern leggja bílnum fyrir mig!"
Allt var alveg ótrúlega flott! Nokkur mötuneyti um að velja; indverskt, japanskt, ítalskt og fleira og fleira. Og aldrei sami maturinn sagði Finnur okkur svo fjölbreytnin er mikil.
Fyrir þá sem hafa séð myndir af Google og ekki trúað þá get ég staðfest að þetta er allt satt ;) Fyrir þá sem ekki hafa séð þær þá eru þær hér.
Eftir matinn (já ég borðaði yfir mig rétt einu sinni;) fórum við heim að klára að pakka. Hitinn var alveg óbærilegur og örugglega í hámarki einmitt á þessum tíma og ég lagðist eiginlega beint í rúmið í hitasvækjunni og ætlaði aldrei að komast út úr því. Skil vel að fólk skuli geta dáið úr hita! Einar náði þó að draga mig urrandi á fætur og í sund þar sem okkur fór að líða muuuun betur. Við vorum því miður ekki þau einu sem fengu þá hugmynd því laugin var stútfull, bæði var sundnámskeið í hálfri lauginni og öllum hinum troðið í hinn helminginn. Nú veit ég hvernig sardínum líður ;)
Um kvöldið elduðum við alveg ótrúlega gott innralæri sem Finnur hafði keypt. Það var alveg fáránlega gott, alveg passlega eldað og ótrúlega mjúkt og gott. Held hreinlega að við höfum aldrei borðað jafn gott kjöt.
Ég hafði sagt við Önnu Sólrúnu að við Einar værum að fara um kvöldið til Íslands og hún yrði að gefa mér stór knús áður en ég færi því það væri svo langt þangað til við sæjum hvor aðra næst. Hún ætlaði sko ekki að gleyma því og oft um kvöldið spurði hún:
"Ertu að fara núna?" og ég sagði nei,
"ok, þú mátt ekki gleyma knúsinu þínu!".
Þegar ég skrapp á klósettið heyrðist:
AS: "Steinunn! Ertu farin?"
SÞÞ: "Neinei, er bara á klósettinu"
AS: "Ok, þú mátt ekki gleyma knúsinu þínu!"
Við Einar fengum svo bæði almennileg knús og boð um að koma aftur í heimsókn og Anna sagðist sko alveg vera tilbúin að lána okkur rúmið aftur :D
Á flugvellinum var svo Matti frændi Einars sóttur því hann þurfti fylgd þar sem hann er ekki orðinn 15 ára. Þá má víst ekki fljúga milli fylkja en hann mátti fljúga frá OC til okkar ef Einar kæmi að sækja hann með skilríki sem sannaði að hann væri sá sem hann ætti að vera :)
Annars var ferðin allt of fljót að líða og helst hefðum við verið til í að vera í 10 daga í viðbót.
Takk fyrir að hýsa okkur og snúast í kringum okkur, Finnur, Hrefna, AnnaSólrún og BjarkiFreyr :D

San Francisco

2007-09-02T14:10:00.000Z

Seinustu dagarnir úti gerðust svo hratt að það bara var enginn tími í blogg.
Við skruppum upp í borg næst seinasta daginn okkar í Calí. Borgina þræddum við með því að byrja á að fara í gegnum Kínahverfið sem er rosalega skemmtilegt hverfi en mikið af alveg eins túristabúðum svo við kíktum bara í tvær. Næst lá leið okkar í Coit tower sem var nú bara rétt hjá okkur þegar við komum út úr Kínahverfinu. Þegar þangað var komið var ég orðin svo þreytt í fótunum eftir að labba upp og niður brekkur að þeir voru farnir að skrálfa ef ég stóð kyrr. Þar af leiðandi var ég orðin of þreytt til að labba niður sveigjurnar á Lombartstreet en við höfðum líka keyrt þar niður um daginn svo við vorum kannski ekki að missa af jafnmiklu ;)
Við röltum næst niður að ströndinni þar sem við settumst niður við sandinn og röltum um bryggjuhverfið þangað til við áttum skipsferð til Alcatraz fangelsisins sem er staðsett á eyju aðeins fyrir utan borgina. Ferðin þangað gekk bara vel og alltaf gaman að koma á eyjuna. Þar átti víst að vera staðsettur fyrrverandi fangi sem hægt var að spyrja spjörunum úr en einhvern veginn misstum við alveg af honum.
Kvöldið var svo endað á því að fara á Hard Rock enda getum við ekki verið þekkt fyrir annað en koma þar við ;) Að lokinni máltíð notuðum við pinna frá Íslandi sem hálfgert tips fyrir þjónana sem sáu um okkar borð og voru þeir mjög ánægðir með það enda ekki auðvelt að nálgast þessa pinna í dag.
Því miður misstum við af lestinni sem við ætluðum að taka heim. Vorum 3 mín of sein :( frekar fúlt því það var alveg 1 og 1/2 tími í næstu lest og þegar við erum komin í þetta hverfi er voða lítið að skoða, eða allavega sem við vissum um. Það var samt alveg ótrúlega gott að komast heim á Stanford aftur enda vorum við alveg búin eftir alla gönguna en við gengum allt nema til baka á lestarstöðina og bilív jú mí það er mjög gott rölt. ;)

Endalausar verslunarferðir

2007-08-29T03:05:00.000Z

Þegar við vorum búin að skutla Finni í vinnuna og Hrefna var búin að heimsækja Bjarka Frey á spítalann kíktum við í verslunarferð. Í þetta sinn fórum við í Great Mall sem var svo stórt að við náðum bara að fara í örfáar búðir áður en við skutluðumst með Hrefnu á spítalann aftur og svo var Finnur sóttur í vinnuna og Anna Sólrún á leikskólann. Þau tvö voru svo plötuð í hestabúðina eins og Anna kallar það (Fry's)og tölvan mín keypt :D :D :D Ótrúlega fín og flott tölva :D Ma'r er svo mikill bruðlari ;) En alveg rosalega góð kaup (segir litli Íslendingurinn í mér) ;P
Hver veit nema við plötum fólkið til að spila í kvöld.
Við Einar ætlum svo að kíkja niður í borg svo á morgun. Kíkjum yfir hana þvera og endilanga.

Það er eiginlega alveg ótrúlegt hvað tíminn er fljótur að líða. Bara tveir dagar eftir hér og svo reyndar einn í Minneapolis og svo er litla sæta sumarfríið okkar bara búúúúið!

2007-08-28T16:54:00.000Z

Dagarnir í útlöndum líða svo hratt að það bara gleymist að blogga!! Tveir dagar liðnir og ekkert komið á netið. Hvernig lifið þið þetta af án okkar?
Sunnudagurinn var alveg steikjandi heitur. Við skruppum í mini golf í Sunnyvale. Sólin var steikjandi heit og við reyndum að standa í skugga alls staðar sem þvílíkur munaður fannst. Þeir staðir voru því miður ekki margir. Vegna þess uppskárum við öll góða bóndabrúnku, því miður. Hefðum betur verið klædd hlírabol en stutterma en vonandi jafnast það út seinustu dagana ;)

Eftir golfið fengum við okkur ótrúlega gott sushi. Við smökkuðum saki sem var alls ekki eins slæmt og maður gæti haldið. Að sjálfsögðu var maginn okkar ennþá svangur svo við fengum líka ís :D Þegar við komum heim vorum við alvarlega dösuð eftir hitann. Það var aðeins um tvennt að velja, sofna í sófanum í letikasti eða skreppa í sund og gera tilraun til að jafna tanið aðeins :)
Ég tók að mér eldamennskuna það kvöldið og við fengum lasagnia sem var bara alveg ágætt þó ég segi sjálf frá.
Við kenndum Einari líka Catan. Í því spili gekk mér mun betur en í golfinu fyrr um daginn, sem betur fer :D

Við erum nú ekki alvöru Íslendingar í útlöndum fyrr en við förum að versla :D Við Einar vöknuðum eldsnemma við Önnu og Finni til að skutla þeim í skóla og vinnu og tókum svo bílinn. Við fórum í Gilroy í Outlet mall og versluðum yfir okkur:) Ótrúlegt en satt eyddum við öllum deginum þarna (ennþá í steikjandi hita) og gerðum bara fín kaup.
Finnur var svo sóttur í vinnuna og við keyrðum heim. Sarah og Augusto fóru með okkur út að borða á Cafe Pro Bono (ítalskur staður í nágrenninu). Þar fengum við alveg ótrúlega góðan mat. Algjört dekur! Eitthvað tók dagurinn á en næstum öllum tókst að sofna í sófanum heima yfir The Daily Show með Jon Stewart. (Tek það samt fram að aldrei þessu vant tókst mér að halda mér vakandi.)

Rólegur dagur

2007-08-26T17:42:00.000Z

Laugardagurinn var frekar rólegur hjá okkur. Sváfum aðeins lengur en venjulega og tókum daginn bara rólega. Þegar AnnaSólrún fór í sundnámskeiðið skruppum við Einar á University avenue til að rölta aðeins og kíkja á Cheesecake Faktory og skoða götulífið. Við völdum alveg rétta daginn því það var götumarkaður þar og fullt af lífi og fjöri. Verið var að selja ýmsar handunnarvörur eins og myndir, skúlptúrar, ker og ýmislegt fleira.
Ostakökurnar sem við fengum á Cheesecake Faktory voru alveg roooooosalega góðar! Ég fór samt í nett sykursjokk eftir hálfa kökuna og gat ekki klárað :( En þetta voru líka stórar sneiðar svo ég missti ekkert af miklu;)
Finnur og Anna Sólrún sóttu okkur svo og fóru með okkur í Fry's þar sem við keyptum flest raftæki og fylgihluti sem við ætluðum okkur að kaupa og skoðuðm líka tölvu fyrir mig :D sem við kaupum líklega næst. (Kannski festi ég kaup á einni seríu enn af Quantum Leap en við látum það bara liggja milli hluta;)
Við Einar fengum að fara með Finni, Hrefnu og ÖnnuSólrúnu að heimsækja Bjarka Frey. Hann var rosalega lítill og sætur. Bjarki er kominn úr hitakassanum og búinn að stækka alveg um 10 cm síðan hann fæddist. Rosalega duglegur :)
"Við" (semsagt Einar) elduðum kvöldmatinn í gær, fylltar kjúklingabringur sem heppnuðust rosalega vel þrátt fyrir að við þyrftum aðeins að breyta sósuuppskriftinni en það spillti alls ekki fyrir.

Santa Cruz

2007-08-25T04:21:00.000Z

Ahhhh, þreytt og sæl eftir daginn.
Keyrðum til Santa Cruz í morgun (aðeins seinna en við ætluðum). Við höfðum ætlað að kíkja aðeins á tívolítækin á Bordwalk-inu og svo setjast á ströndina í afslöppun. Tíminn leið rosalega hratt og klukkan var orðin rúmlega 5 þegar við loksins settumst á ströndina. Það var svosem alveg ágætt, það var skýjað svo setan á ströndinni var bara mátuleg. Anna Sólrún skemmti sér konunglega við að hlaupa í átt að öldunum og svo aftur í burtu þegar þær nálguðust. Við Einar tókum aðeins þátt í gamaninu og ég held ég hafi bara skemmt mér alveg jafn vel og hún :D
Hér eru svo stolin mynd frá Finni ;)

3. dagurinn!!

2007-08-24T17:35:00.001Z

Við erum rosalega dugleg að túristast í útlöndum. Skoðuðum Stanford svæðið fyrsta daginn og kíktum í Hoover turn og Stanford shopping center fyrir utan að labba aðeins um svæðið. Einar var bara nokkuð sprækur um kvöldið en ég rotaðist í sófanum strax eftir kvöldmat.

Í gær fórum við niður í borg með Finni og Önnu en Finnur tók sér tvo daga í frí því Anna var í fríi og líka til að vera með okkur :D Rosalega gaman. Hann er eiginlega að taka verslunarmannahelgina út aðeins of seint. Golden Gate og Pier 39 voru skoðuð.

Nú er bara rjómablíða og ferðinni er heitið til Santa Cruz á Boardwalk og ströndina, ahhhh afslöppun.

Lent ;D

2007-08-22T08:28:00.000Z

Geeeeeisp! Við erum komin til Finns og Hrefna eftir laaaangt laaaaangt flug. Gott að komast í gott rúm :D Segi bara góða nótt og góðan dag til ykkar á Íslandi :D

Bloggvæðingin

2007-08-19T20:28:00.000Z

Algjör snilld þegar næstum öll familían er farin að blogga! Meira að segja 7 og 10 ára frændi og frænka komin með blogg. Ég held að við þurfum almennt ekkert að hittast :) Bara lesa bloggin hjá hvort öðru, vera dugleg að kommenta og við tölum örugglega meira saman en venjulega. Fyrir utan allar fréttirnar sem maður missir ekki af ;)

Bíó

2007-08-16T13:57:00.000Z

Ég held að maður sé farinn að venjast því að hafa mörg bíó á Íslandi sem sýna sömu myndina. Það þarf næstum aldrei að hafa áhyggjur af því að það sé uppselt. Því var ekki gert ráð fyrir að það yrði uppselt þegar fara átti í gær en jújú.
Ég held samt að ég myndi ekki kvarta mikið þó það yrði erfiðara að ná í miða og maður þyrfti bara að koma snemma, ef fleiri myndir væru sýndar og þá bara hver í færri bíóum.

B.t.w. rúmlega einn vinnudagur eftir :D Pizzur og kökur í tilefni þess á morgun!

4 vinnudagar eftir!!

2007-08-13T17:53:00.000Z

Ekki misskilja mig, það er ekki leiðinlegt í vinnunni, ég bara hlakka svo til að komast í frí!!
Annars hef ég komist að þeirri niðurstöðu að stelpan í móttöku BN lesi bloggið mitt, hún bauð mér góðan daginn þegar ég mætti í dag... framför ;) Hver veit, kannski brosir hún næst þegar ég kem ;) Fyrir þá sem ekki vita um hvað ég er að tala vísa ég í Pollyönnu færslunar 7.ágúst.
...ógod! Ég er búin að vera svo lengi að skrifa að ég man ekki lengur ástæðuna fyrir blogginu. Ok, ég looooofa að næsta færsla verður ótrúlega skemmtileg og áhugaverð...

Kindarlegt “kynlíf”

2007-08-09T15:11:00.001Z

Mér var bent á þessa blaðagrein um daginn. Fór að velta því fyrir mér hvort þetta væri heimurinn sem koma skal, ef þú getur ekki varið þig þá tökum við ekki mark á brotum gegn þér.

Samkvæmt ástralska netmiðlinum www.news.com.au var máli manns sem var staðin að því að hafa mök við kind vísað frá dómi. Ástæða frávísunarinnar var sú að kindin var ekki í stakk búin til að bera vitni fyrir réttinum.
Maðurinn sem er frá Haaksbergen í Hollandi var ákærður um þetta athæfi eftir að bóndinn kom að honum í “samförum” við kindina. Frávísunin var réttlætt með því að þar sem kindin gæti ekki borið vitni um að hún hefði ekki gengið sjálfviljug til “leiksins” og það sem meira er; hún gæti heldur ekki sýnt fram á að hún hefði orðið fyrir andlegum skaða við atvikið, þótti réttast að vísa málinu frá.
Samkvæmt Hollenskum lögum er dýraníð af þessu tagi ekki ólöglegt svo framarlega sem ekki verður sýnt fram á að dýrið hafi ekki viljað taka þátt í “kynlífinu”!
“Þessir perrar ganga lausir og hafa sitt fram - bara af því að það er ekki hægt að láta kindur bera vitni” er haft eftir dýraverndunarsinnanum Jos van Huisen.
Þetta er auðvitað með hreinum ólíkindum.

Að sjálfsögðu gengur kindin sjálfviljug til verksins, hver trúir öðru? :P

Sólsól skín á mig...

2007-08-07T12:41:00.000Z

Hvar er sólin? Brúnkan er dottin af mér!! Vil fá sólina aftur!!
Það er samt greinilegt að sumarið er að verða búið, ég á bara 9 vinnudaga eftir og svo fæ ég tveggja vikna sumarfrí áður en skólinn byrjar :D Ótrúlegt hvað tíminn hefur liðið, enda alveg frábært sumar!!

Fór áðan að skila leigusamningi upp í BN. Var nett pirruð út í stelpuna í afgreiðslunni... Hef samt ákveðið að hafa þetta ekki neikvætt blogg svo ég tek Pollýönnu á þetta. Vil þakka fyrir allt jákvætt og brosmilt afgreiðslufólk sem ég hef hitt seinustu daga. Almennt yfirmáta skemmtilegt fólk ;)

Íbúðin

2007-08-01T17:55:00.000Z

Búið að selja íbúðina :(
Á yfirverði... við erum ekki sátt!

100. færslan :D

2007-07-27T09:21:00.000Z

Ég er pínu spennt :D Kíktum á íbúð um daginn sem þarf að gera alla upp. Vorum eiginlega að leita að einhverju svoleiðis svo við gætum fengið íbúð ódýrt og Einar er svo klár að hann getur gert hana upp. Aldrei að vita nema ég hjálpi honum eitthvað.... ef ég er í góðu skapi :D
Við gerðum semsagt tilboð í hana í gær, mjög lágt en okkur fannst líka frekar mikið sett á hana. Nú er bara að bíða fram að hádegi og sjá hvað eigandinn segir... ef hann segir eitthvað... ódíródír
Vantar alla þá góðu strauma sem til eru ;) :P

Potterinn

2007-07-25T21:23:00.000Z

Er loksins komin með seinustu bókina af Harry í hendur... Veit varla hvort ég tími að byrja á henni... Sorglegt að þetta sé bara búið en ég verð samt að fá að lesa endirinn :D

Sumarfrí

2007-06-22T11:36:00.001Z

Loksins, loksins, loksins er ég farin að skipuleggja eitthvað ferðalag til útlanda í sumar! Vorum að kaupa okkur miða til Bandaríkjanna í lok sumars og mér líður bara eins og ég sé að fara á morgun ég er svo spennt :D

Æðislegt veður

2007-06-19T15:03:00.000Z

Ég velti því fyrir mér hvort það sé bara ég eða er fólk í vondu skapi í dag? Skil ekki hvernig það er hægt í þessu frábæra veðri! Margir í dag annað hvort eru rosalega frekir og dónalegir eða skella á án þess að kveðja. (Ekki svo að skila að fólk skelli á mig af reiði heldur finnst greinilega ekkert mikilvægt að segja bless í símann).
Til allra annarra vona ég bara að þið njótið dagsins og smælið framan í heiminn, það ætla ég að gera :D :D :D :D ;)

Blogghringurinn

2007-05-25T14:59:00.000Z

Það eru bara allir hættir að blogga... Mætti halda að allir væru búnir í prófum;)

Gleðilegt sumar :D

2007-05-23T10:35:00.000Z

Loksins, loksins, loksins komið sumar. Þó það virðist varla vera sumar, meira svona einhverskonar hálfthaust-hálfvor stemmning með sól og snjókomu og halgléli til skiptis!! Ég þurfti meira að segja að skafa bílinn í fyrradag.
Annars er fínt að vera komin aftur í sumarvinnuna allir búnir að taka rosalega vel á móti mér, bjóða mig velkomna aftur og svona. Sumir hafa meira að segja bara boðið mér góðan dag og svo komið aftur seinna og sagst ekki hafa áttað sig á að ég væri komin aftur, fundist ég bara passa svo vel þarna :) það er alltaf gaman að því, ég á bara heima hérna :D

...svo ætla ég að panta gott veður á suðurlandinu um helgina :D

Morgunstund...

2007-05-07T11:08:00.000Z

Mætti á Bókhlöðuna þvílíkt dugleg í morgun, rétt fyrir 9!! Var næstum flogin á hausinn í tröppunum en náði í loftköstunum að lenda á löppunum aftur. Leið eins og hálfvita og tók upp símann minn til að senda einhverjum sms. Hætti svo við...
Skil ekki afhverjum mér finnst eins og þetta hefði verið minna skammarlegt ef ég gæti sagt einhverjum frá þessu. Einhvern til að deila vandræðagangingum með mér. Hmmmm, ég ákvað að halda andliti og bera skömmina ein. Tókst í 2 klukkutíma, þá er ég búin að blogga þessu og deila með öllum sem vilja lesa, hjúkk hvað mér líður vel ;)

B.t.w. var beðin um að passa tölvu meðan eigandinn fór í mat. Hún sagðist ætla að vera í hálftíma en það er næstum kominn klukkutími. Er alveg að fara að fara að fara. Segi eins og Lucas í Empire Records: "I wonder if I will be held responsible for this." Vísa þá í ábyrgð mína yfir tölvu ókunnugu stelpunnar.

Kaldhæðni

2007-05-01T00:03:00.000Z

Sá brot af þætti á stöð 2 um kostningarnar í ár. Í kvöld var Geir Haarde tekinn fyrir. Í upphafi þegar verið var að tala aðeins um Sjálfstæðisflokkinn, Geir og Davíð var spilað lag. Lagið var spilað af hljómsveit sem ég eeeeelska, Muse. Þannig að það var eitthvað gott í þessum þætt (djók;)). Svo fór ég aðeins að velta þessu fyrir mér. Fannst frekar kaldhæðnisleg að láta hljómsveit sem syngur gegn ráðamönnum.
...Kaldhæðnin er ekki búin! Lagið sem spilað var heitir Take a bow. Texti þessa yyyyndislega lags er svona (takið sérstaklega eftir viðlaginu:

Corrupt
You're corrupt
Bring corruption to all that you touch
Hold
You behold
And beholden for all that you've done
And spin
Cast a spell
Cast a spell on the country you run
And risk
You will risk
You will risk all their lives and their souls

And burn
You will burn
You will burn in hell, yeah you'll burn in hell
You'll burn in hell
Yeah you'll burn in hell
For your sins

Hvort ætli vinstir manneskja hafi ráðið lagavali eða einstaklingurinn hafi ekkert hlustað á textann?

Nýtt og fínt og grænt og sumarlegt

2007-02-12T22:25:00.000Z

Mér fannst vera kominn tími á eitthvað aðeins líflegra útlit svona :D

Kannski verður það þá til þess að ég verð dugleri í bloggeríinu... eða kannski ég sé bara bjartsýn, við skulum sjá.

Namminamm

2006-11-29T23:37:00.000Z

Ég lykta af hrefnukjöt... ótrúlega góóóóóðu hrefnukjöti. Takk fyrir samveruna stelpur mínar og kæra “leynivinkona” ég er strax farin að upphugsa góða gjöf ;)

Jess!!

2006-11-24T15:07:00.000Z

Búin að klára allt sem ég á að skila af mér á þessari önn :D

...bla!

2006-11-23T22:51:00.000Z

B.t.w. rosalega er þátturinn The Player ótrúlega asnalegur!!!

Frávik fá norminu

2006-11-23T22:36:00.000Z

Var á jólabóka upplestri í Mosó í kvöld. Gaman að því, langar að lesa þær allar;)
Ein spurning til rithöfunda var eitthvað um frávik frá norminu; þar sem taka þarf fram, til dæmis ef sögupersóna er kona því annars gerir lesandi sjálfkrafa ráð fyrir að það sé karl.
Mér finnst rosalega merkilegt hversu satt þetta er! Ég hefði örugglega gert ráð fyrir að ef talað væri um rithöfund frá Hvíta-Rússlandi þá myndi ég sjálfkrafa gera ráð fyrir að það væri karl nema ef annað er tekið fram.
Ef ég læsi sögu um hóp fólks, allar upplýsingar væru gefnar fyrir utan hvers kyns fólkið væri, ætli ég gerði þá ráð fyrir að allt væru þetta karlar?

Eins og með gátuna sem ég hefði örugglega aldrei fattað ef ég hefði ekki fengið svarið gefið:
Faðir og sonur lenda í bílslysi og eru fluttir á sjúkrahús, báðir lífshættulega slasaðir. Þeir eru fluttir á sitthvora skurðstofuna. Inn til sonarins kemur skurðlæknir sem hikar þegar hann gengur inn og segir: "Ég get ekki framkvæmt þessa aðgerð. Þetta er sonur minn!" Gátan er samsagt sú; hvernig getur það passað?

Annað frávik frá norminu svona til að eyðileggja þessa djúpu pælingu. Ég sá bíl með stýrið hægra megin í dag. Var búin að líta oft yfir og farið að finnast frekar "krípí" að þar var enginn bílstjóri, bara farþegi. Ohhh, maður fer strax að ímynda sér eitthvað fríkí þegar eitthvað er ekki eins og venjulega.

Skin og skúrir

2006-11-19T13:09:00.000Z

Hver segir svo að það sé aldrei hægt að segja til um hvernig veður komi eftir 5mín á Íslandi? Þegar ég fór að sofa í gær var auð jörð, frekar hvasst en bara svona eins og það er búið að vera. Þegar ég vaknaði var svona:

Bíllinn okkar fastur í skafli og ég að sjálfsögðu fór út að ýta;) (á engar myndir af því af því að ég var út að ýta;) Var ég búin að segja að ég fór út að ýta?)
Jeppakallarnir voru eins og hrægammar að veiða fasta bíla upp úr sköflunum. Einar ætlaði sko að komast sjálfur út úr sköflunum nýbúinn að skipta yfir á naglana.

En þeir voru nú þarna tveir og höfðu greyin ekkert að gera þannig að hann leyfði þeim að draga sig bara af góðmennskunni einni saman. Hvað annað?

Mér finnst þetta merkilegt land!

9 dagar...

2006-05-04T16:35:00.000Z

Fjúff! Tvö próf búin og komin með vinnu. Stóru fargi af manni létt!! ;)

Stress!!!!

2006-04-05T13:51:00.000Z

Úff!!!! Stress! Stress! Er á leiðinni í atvinnuvital eftir 40mín og svo próf í kvöld um kl.18.
20 skilgreiningar syndandi í hausnum á mér og stress syndandi í mallanum!!

Nei hæ!

2006-04-01T13:16:00.000Z

Hmmm, ætli það sé einhver sem kíki ennþá á þetta? Spurning;) Ég var víst búin að týna lykilorðinu og komst ekkert hérna inn... Fyrr en núna:D Ætli það sé ekki best að reyna að halda áfram bloggeríinu. Kannski mér detti eitthvað skemmtilegt í hug annað en tilkynning um lykla;) B.t.w. ég er kannski komin með vinnu í sumar:D:D:D

Vííííí!!!!!!

2005-01-31T15:28:00.000Z

ÉG ER BÚIN AÐ FÁ LYKILINN AÐ ÍBÚÐINNI!!!! Sorrý.... við:) Ég er ennþá að venjast þessu við hlutum. When "I" become "we";)
Við byrjum að flytja á miðvikudaginn (víííí!). Vonandi verð ég orðin frísk þá. Gerði tilraun til að mæta í vinnuna í dag... Entist ekki lengi. Mér líður eins og algjörum aumingja sem hættir ekki að vera veikur. Ohhhh!
Stefni á fullan frískleika á morgun!

Staðan:)

2005-01-27T12:05:00.000Z

Jæja, ætli það sé ekki best að koma með stöðuna á íbúðinni:)
Mamma og pabbi fóru í gær að hjálpa konunni að flytja út og sögðu mér að flest allt væri komið og bara smáhlutir eftir og þrif. Sem ætti þá að þýða að við gætum mögulega fengið íbúðina um helgina:):):):):):) Ef ekki þá, þá allavega í seinasta lagi á þriðjudag. Ég vona samt að það verði núna um helgina, annars gætum við ekkert flutt fyrr en á miðvikudag út af vinnunni...
Svo verð ég líka að vona að ég verði orðin frísk... Ég er líklega komin með þessa elskulegu flensu sem allir eru að fá. Hiti, hausverkur og svimi. Ekki gaman:( Versta er að núna er svo erfitt að fá fólk inn í staðin fyrir mig, við erum orðin svo fá í fullu starfi og ein af þeim veik. Þetta hefur samt vonandi reddast:)

Ríalítíshokk

2004-12-14T14:18:00.000Z

Ég fékk nett ríalítí shokk í gær við íbúðarskoðun... Úff, mar er orðinn svo stór!! Það var að sjálfsögðu fljótt að ganga yfir:)

B.t.w. Finnur, Hrefna og Anna Sólrún eru komin til landsins!! 4vikur!!
(Bara 10dagar til jóla og ég ekki búin að kaupa eina einustu jólagjöf!)

Jólasnjór

2004-11-25T14:39:00.000Z

Ohhhh, hvað var þessi snjór að hverfa? Ég var komin í svo fínt jólaskap*<;o)
...eða hann hefði átt að koma seinna;)
Talandi um jól, ég kvíði helginni... jólaörtröð!!! Hvernig datt mér í hug að fara að vinna í Kringlunni?!?!

Ég mæli ekki með...

2004-11-16T04:13:00.000Z

Ég sá örugglega það ógeðslegasta sem ég hef á ævinni séð núna um daginn... Aðeins þess vegna ætla ég að deila því með ykkur:D
Ok, ég er að keyra í bíl (er að vísu farþegi, ekki að það skipti máli). Allt í einu, lengst út í sveit sjáum við nokkra bíla stopp út í vegakanti eins og eitthvað hafi komið fyrir. "Ó, nei! Bílslys!!!" Fyrsta sem ég hugsaði. Keyrum aðeins nær... Sjáum eitthvað liggja í götunni... Sé rjúka úr dótinu sem liggur á jörðinni... Keyrum nær... Keyrum við hliðina á dótinu... lifur, garnir o.s.frv.... aðeins seinna; fullt af blóði... Aðeins seinna; dauður, illa farinn hestur... Það voru alveg þó nokkrir metrar á milli innyflanna og hestsins!!! Virkilega viðbjóðslegt.
Las svo um annan árekstur við hest í mbl.is í dag.

Hættið svo að kvarta;)

2004-10-26T13:49:00.000Z

Það að kynna kærasta fyrir fjölskyldunni er frekar fyndið fyrirbæri.... Sérstaklega ef það er fjölskyldan mín;p

Við Einar vorum búin að vera sama í 3vikur á laugardaginn þegar ég ákvað að kynna hann fyrir familíunni og það á einu bretti... Ég tók hann í fjölskylduboð!!! Útskriftarveislu Aðalheiðar.
Ég byrjaði á að mæta ein enda með fullan bíl af dóti fyrir veisluna og allt allt of sein. Á bílaplaninu í Byggðó tók hersingin á móti mér veifandi og kallandi á bílaplaninu (hersingin= barnabörnin og Baddi bróðir) og restin af familíunni stóð í glugganum. Um leið og ég opnaði bílinn hópuðust allir inn: "Hvar er hann? Hvar er hann?". Ég gat ekki verið fegnari, Einars vegna að ég var ekki búin að sækja hann! Þegar ég svo kom upp komu sömu spurningarnar frá öllum þar. Mikill spenningur!
Allt þetta gerði mig alveg einstaklega stressaða þegar ég loksins fór og sótti hann! Ég alveg skalf á beinunum. Kom með hann upp og lét hann taka í hendina á fólki (hljómar eins og ég hafi skipað: "Taktu í hendina á manninum!"). Pabbi tók þetta bara á djókinu og gekk upp að honum þar sem allir voru að heilsa: "Sæll, Guðmundur heiti ég!" Fyrir fólk sem er ekki kunnugt fjölskyldunni þá í fyrsta lagi höfðu þeir hisst áður og þar að auki heitir pabbi minn ekkert Guðmundur... En maður veit svosem aldrei, þetta er kannski leyndur draumur hans;p
Annars gekk þetta bara nokkuð vel, enginn fór neitt svakalega illa með hann eins og mér hafði verið hótað. Það átti sko að rekja úr honum garnirnar og fylla hann til að komast að hans rétta manni.
Hmmmm, spurning hvort það gerist þá næst....?

Kríli!

2004-09-27T13:49:00.000Z

Guðrún Erna systir Hönnu Rutar er búin að eignast litla stelpu. Hún fæddist í gær 26.september, 15merkur og ég veit ekki betur en að allt hafi gengið bara vel.
Ég hef að vísu ekki séð litla krílið en get ekki öðru trúað að hún sé algjört krútt!!

Hringsnú

2004-09-22T18:51:00.000Z

Hausinn minn snérist í hringi í gær! Ég skipti um skoðun á hálftímafresti... Úr varð að vinna2 (HardRock) bauð enn betur og ég tók því. Ég verð semsagt í vaktavinnu aftur í næsta mánuði. Eitthvað sem ég ætlaði aldrei að gera aftur. Greinilega er einfalt að fá mig til að skipta um skoðun... Fyrir rétt verð;)

Sá á kvölina sem á völina

2004-09-21T20:31:00.000Z

(Þessi yfirskrift minnir mig alltaf á Smjattpattana frá því ég var lítil;))

Úff!! Ég stend á milli tveggja vinna... Var búin að segja upp á stað1 því staður2 bauð mun hærri laun, núna er staður1 búinn að bjóða mér hærri laun ef ég verð áfram hjá þeim.
Þetta er ógislega erfitt!

Staður1:
Betri vinntímar
Skemmtileg vinna
Fjölbreytt vinna
Lægri laun
Mikið hrós

Staður2:
Vaktavinna (langir vinnudagar)
Nokkuð einhæf vinna
Hærri laun
Mikið hrós

Ég verð að ákveða þetta á næu 2-3tímunum...

Nöfn

2004-09-20T20:54:00.000Z

Ég hef núna kallað strák í vinnunni minni vitlausu nafni nokkrum sinnum í röð sama daginn. Þetta nafn var fast í hausnum á mér þennan dag einhverra hluta vegna og fyrr né síðar hef ég ekki kallað hann neinu öðru en hans eigin nafni.
Einhverra hluta vegna tók hann þessu alveg rosalega illa og varð virkilega fúll.
Ég get ekki séð afhverju fólk þarf að taka svona hlutum svona svakalega illa, ég meina ég hef verið kölluð Gerður, Þórunn, Inga og Sigrún í seinustu viku bara af því að fólk ruglaðist... Ég sá ekki neina ástæðu til að móðgast þó að fólk gerði þetta endurtekið. Ég meina ég er ný á staðnum svo mér finnst ekki skrítið að fólk ruglist, fyrir utan að þetta eru mismæli, ekki eins og fólk meini neitt illt með þessu.

ADSL í Mosó!!!

2004-09-13T20:42:00.000Z

Loksins, loksins!!!
Við höfum fengið adsl heim. Við höfðum fengið það í tölvuna fyrir svona viku en gaurinn í ogvodafone hafði látið okkur fá vitlaust username... Það reddaðist nú samt:) Öllum til mikillar ánægju. Núna er bara spurning hvort ég verði jafn duglega að blogga og þegar ég var úti... Hmmm.
Ég var nú samt endalaust fegin þegar ég kom heim, ekki því það hafði verið svo leiðinlegt í USA heldur hafði ferðin heim tekið svo miiiiiikinn tíma og lítinn svefn:(
Ferðin frá því að fyrsta vélin fór í loftið og þar til seinasta lenti í Keflavík tók 20tíma... Það er allt of mikið fyrir aumingja eins og mig, sérstaklega þar sem ég var eitthvað að byrja að kvefast og þrýstingurinn við lendinguna (í öll þrjú skiptin!!) ætlaði alveg að æra mig. Málið var að ég fékk þvílíkan eyrnaverk svona hálftíma fyrir lendingu þegar flugvélin byrjaði að lækka flugið, í seinasta fluginu (icelandair) var það ekki eins vont því þá var ég orðin svo tilfinningalaus í eyranu... :/
Icelandair vélinni var seinkað um 2 tíma. Fyrst klukkutíma þegar við lögðum af stað frá rananum og svo vorum við klukkutíma í vélinni að bíða eftir að geta farið í loftið... öllum til mikillar "ánægju". Ferðin þar gekk samt vel. Flugfreyjurnar frábærar og farðþegarnir ekkert svaka pirraðir þrátt fyrir seinkun og ótta við að missa af tengiflugi. (Það er svo leiðinlegt að fljúga þegar allir eru pirraðir:)
Klukkutíma fyrir lendingu leið yfir eina stelpuna og ég, svefnlaus (semsagt að fara að grenja), vissi ekkert hvað var að gerast þegar flugfreyjurnar sóttu súrefniskút og reyndu að vekja stelpuna upp en hún hafði dottið á gólfið. Sem betur fer fór henni að líða betur eftir þetta og við lentum í Keflavík aðeins einum og hálfum tíma á eftir áætlun... Ekkert mál:)
Á flugvellinum fékk ég móttöku hóp með skilti og allt því Hanna, Una og Berglind sóttu mig. ElínLóa komst ekki því hún þurfti að mæta í skólann, við kíktum bara í heimsókn til hennar þegar hún var búin og fórum á kaffihús og svona:) Jebb, ég svaf ekkert í 2 og 1/2 sólarhring... Kexrugluð;)

Bloggedíblogg

2004-08-31T17:22:00.000Z

Eftir nokkuð reglulega 3mánaða blogg er ég komin í frí... Nei kannski ekki alveg. Ég ætti að fara að blogga aftur um leið og við fáum nettengingu aftur í Mosó. Tölvan heima mótmælti för minni heiftarlega með því að fremja sjálfsmorð. Sem betur fer hugsar brósi fyrir öllu og gerði koppíu af harðadisknum;) Hjúkk mar.
(Það bjargaði líka því að við fáum loksins adsl sem sumir hafa suðað um í laaaaaaangan tíma:))

Lent

2004-08-26T17:16:00.000Z

Komin heil á höldnu heim.... Ekkert búin að sofa... Get ekki skrifað... zzzzzz

Heim...

2004-08-25T11:00:00.000Z

Jæja, þá er sumarið liðið!! Ótrúlegt hvað þetta líður hratt! Ég er nýkomin hingað...
Jæja, ég er að fara út á flugvöll núna. Lítur út fyrir langa ferð... ég á að lenda heima eftir 19tíma og 20mín og er ekkert búin að sofa.
Sé ykkur á Íslandi í fyrramálið.

Getur e-r þýtt?

2004-08-23T08:01:00.000Z

Ég fann link inn á síðuna mína þar sem eina sem ég skil er: "Hvaða tungumál er þetta eiginlega?????" Getur einhver þýtt afganginn? :

"Tara said...
Porque está aqui este blog???? Como o descobri? Do que trata afinal? Que lingua é esta? Não sei... Mas a resposta é porque fiquei desiludida com a ordem das cores do arco-iris.. na minha opiniao amarelo,laranja,rosa, vermelho, azul, verde e roxo tinha mto mais logica!!!P.S. já agora, andava á procura de um site sobre gatos estrabicos que ladram e mijam em copos altos com macieira e gelo..."

Ég er bara svo forvitin... Hmmm, þetta gæti verið eitthvað slæmt... Jæja, þá eyði ég því bara í fyrramálið:D

Helgaryfirlit

2004-08-23T07:29:00.000Z

Skrítið hvað seinustu dagarnir eru alltaf fljótir að líða! Helgin hefur flogið frá mér svo hratt að ég hef ekkert náð að blogga neitt.

Á föstudeginum fórum við í partý í vinnunni hans Finns. Þvílíkt fjör! Trambólín, sundlaug með stökkpalli, brjálað stórt og flott hús og risa garður! Allt í Santa Cruz en þar hef ég komið tvisvar í sumar. Æðislegur staður, einmitt staðurinn til að búa á í ellinni... Ef maður vill búa í sólinni í ellinni. Við Finnur vorum í sundlauginni í einhverja 2-3 tíma og gerðist meira að segja svo kræf að vera sólarvarnar laus en sluppum við bruna, ótrúlegt en satt:) Fjörugur dagur enda rotaðist ég gjörsamlega eftir hann.

Laugardagurinn fór í sjopperí... Mig vantar buxur! Það er ekki það að ég hafi fitnað! Þeir segja kannski að barni vaxi en brókin ekki en það segir enginn að brækurnar minnki ekki! Ég held mig við það, þær minnkuðu!
Mér tókst að sjálfsögðu að ekki að finna neitt en Finnur og Hrefna gerðu stórinnkaup... Ohhh, óþolandi!! Ég náði samt að kaupa mestan part af gjöfunum þannig að ég þarf ekki að leggjast í keypti-ekkert-þunglyndi;)

Sunnudaginn var jafn pakkaður og hinir (já við eyddum öllum laugardeginum í að versla!). Við vöknuðum eftir allt of stuttan svefn (við Hrefna vorum að flokka MARGAR myndir í framköllun). Leið okkar þennan dag lá til Alcatraz fangelsisins á Djöflaeyjunni frægu. Mjög interesting ferð... eins og sjá má af myndunum sem teknar voru af mér þar! Ég er vægast sagt einbeitt á þeim myndum.

Nokkuð bissí helgi og myndasíður Finns og Hrefnu meira að segja að mestu á réttum stað útaf ofvirkni Hrefnu! Næstu dagar verða líklega ekkert skárri; nóg að gera þar til ég fer heim... Það er allt of stutt í það, ég veit ekki hvort mér á að finnast gott eða slæmt að vera að fara... Það verður fínt að koma heim en það er líka frábært að vera hérna... Ohhh, erfitt líf! Ég verð bara að koma aftur!

Falli mér allar feigar flær úr flösu!

2004-08-20T07:00:00.000Z

Hið órtúlega hefur gerst!! Hrefna setti á netið 7, mögulega 8 myndasíður á netið (er að vinna í 8.)!! Þetta þýðir að þau eru komin á réttan stað í myndunum!!! Það sem er nýtt á netinu gerðist bara seinustu helgi!!! Þetta er ótrúlegt!
...Nú bíð ég bara eftir að sjá svín fljúga!

Stubbar segja bæbæ stubbar segja bæbæ!!

2004-08-18T21:01:00.000Z

Við Hrefna byrjuðum morguninn í gær á að horfa á LazyTown í sjónvarpinu. Una hafði hringt í okkur og látið okkur vita:) Þvílíkt fjör, Maggi Scheving og Stefán Karl. Ég verð að segja það að hann Stefán Karl er snillingur!! Snilldar leikari:) Svona verða næstu morgnar hjá mér! LazyTown!!! ;)

Í gærkvöldi var svo kveðjupartý því þau Elvar og Veronica og börn eru að flytja til Boston núna bráðlega.
Svo eru Guðrún, Snorri, Sif, Baldur og Una að fara að skreppa til San Diego á föstudaginn þannig að þetta var seinasta matarboðið mitt hjá þeim:( Kannski kem ég einhvern tíma aftur til Kaliforníu... Hver veit:)
Maturinn var æðislegur og kvöldið frábært.
Guðrún og Snorri, bara takk fyrir mig!!
Una, ég kíki í kaffi til þín þegar þú kemur til landsins!! :)

Afmæli

2004-08-17T07:39:00.000Z

Hann pabbi minn á afmæli í dag, til hamingju með afmælið!!!
Við Finnur ætluðum að hringja á afmælisdaginn en þú verður líklega uppá spítala einmitt þá þannig að við reynum bara að hringja seinna. Gangi þér vel:)

Santa Cruz

2004-08-17T07:15:00.000Z

Við Una og Hrafnhildur fórum saman á ströndina og Bordwalk í Santa Cruz seinasta sunnudag. Þetta var seinasta skiptið sem við höfðum til að hittast allar þrjár. Það gerði það bara meira raunverulegt hvað það er að styttast í heimferðina.
Við skemmtum okkur alveg rosalega vel. Við Hrafnhildur eyddum kannski ekki miklum tíma á ströndinni heldur gegnum í barndóm og fórum alveg fullt í rússíbönum. Una var rosalega dugleg í sólinni og brúnkaðist alveg helling, með mjög skemmtilegu munstri á bakinu eftir sólarvörnina;)
Ég hafði ætlað að brúnkast á löppunum... Hmmm, tókst ekki alveg.
Af ströndinni brunuðum við svo heim til Hrafnhildar í sturtu og svo fórum við Una í barnaafmæli hjá Jesiggu, dóttur Jennifer og Sigga sem vinnur með Finni. Við mættum að sjálfsögðu þangað á undan Finni og börnunum þremur, Önnu, Sif og Baldri. Frekar fyndið, tvær barnlausar sem þekkja varla foreldrana. "We are here for the cake!"
Eftir afmælið keyrðum við Finnur og Anna út á flugvöll til að sækja hása Hrefnu. Skýrningin á hæsinu var sú að Hrefna hafði verið í brúðkaupi hjá Kerri og John á vesturströndinni. Ekta vesturstrandar brúðkaup (að mér skilst) með tilheyrandi öskrum og píkuskrækjum. Anna starði á mömmu sína alla leið á veitingastaðinn, stjörf af þreytu og hissa að sjá mömmuna sína sem hafði horfið í alveg 4daga.

Ég komst að því í dag að ég verð hér úti einum degi styttra en ég hélt. Ég fer heim á miðvikudegi en ekki fimmtudegi... Lætur mig líða eins og ég hafði tapað heilum degi:(

Latibær

2004-08-15T05:59:00.000Z

Hehe, litla Íslendingahjartað mitt tók kipp núna fyrir mínútu. Auglýsing fyrir Lazy Town var í sjónvarpinu, með Magga Skev og allt!! Allt fullt af Íslendingum í sjónvarpinu, Maggi Skev og Hilmir Snær! Mér gæti ekki fundist ég vera meira heima;)

Auglýsingar

2004-08-13T20:29:00.000Z

Hérna eru lyfjaauglýsingar ekki bannaðar eins og heima. ...ég allavega held að þær séu bannaðar heima.
Í gegnum auglýsingarnar er foreldrum kennt að barnið þeirra sé örugglega ofvirk eða þunglynt eða eitthvað álíka og það verði að fá þetta ákveðna lyf svo þau geti upplifað hamingjusama og eðlilega æsku.
Aðrar aulýsingar auglýsa lyf sín handa þér og fullyrða að lausn á öllum þínum vandamálum séu prózac eða eitthvað álíka og þú bara verður að hringja í lækninn þinn til að verða hamingjusöm/-samur.

Lyfjaauglýsinga-verðlaunin mín fær samt lyfið sem gerir neglurnar sterkari og losa okkur við alla þessa ógeðslegu sýkla sem eru að skemma neglurnar okkar(!). Þetta gangi nú bara ekki lengur og við bara verðum að eignast meðal sem læknar þetta.
Lyfið er samt alls ekki ætlað fólki með lifrar- eða nýrnabilanir (hmmmm). Fyrir þá sem ekki hafa þau vandamál verða þó að sætta sig við þá staðreynd að samt hafa komið upp lifrarskemmdir og húðvandamál og venjulegu aukaverkanirnar eru aðeins höfuðverkur, niðurgangur og útbrot.
En ég meina, er það ekki bara eðlilegt gjald í staðin fyrir rosalega sterkar og sýklalausar neglur?!?!?

Spúúúhkí!!

2004-08-12T07:50:00.000Z

Anna Sólrún sofnaði loksins á leikskólanum í dag. Hún svaf bara stutt en það voru þó framför. Hún hefur ekki viljað sofna þar hingað til, þ.e.a.s. í seinustu tvö skipti.
Daníel Andri var svo í heimsókn hjá mér á meðan Anna var í leikskólanum. Hann var bara rosalega ljúfur og góður. Bara svolítið þreyttur rétt áður en pabbi hans sótti hann.

Ég lét stelpurnar, Unu og Hrafnhildi plata mig á hryllingsmynd núna áðan. Ég er svo brjálæðislega hvekkt eftir svona myndir. Ég læt stjórnast svo auðveldlega að við fórum að sjá The Village. Myndin hefði ekki getað komið mér betur á óvart!! Hún er alveg virkilega góð og ég var ekkert smá sátt við hana, ég mæli sterklega með henni. Ég sagði örugglega á 5mín. fresti: "Ohhh, ég er svo sátt við þessa mynd!!"
Ég held bara að ég geti sofið í nótt þrátt fyrir myndina:)

Fimmta veikin

2004-08-10T07:15:00.000Z

Baldur, sonur Guðrúnar og Snorra var greindur um daginn með Fimmtu veikina. (Þá er ég ekki að tala um fimmtu veiki ævi sinnar:)) Hann varð einmitt veikur sama dag og við Anna.
Við hér fórum að lesa okkur til um sjúkdóminn og komumst að því að einkennin gætu átt við um okkur og meira að segja Hrefnu líka því fullorðnir fá oft væg flensueinkenni án hita.
Sarah kom svo í heimsókn til okkar í kvöld að horfa á The Daily Show... Hún var að fá útbrot einmitt viku eftir veikindin sín. Við höfum fundið uppsprettuna... Mögulega...
Hmmm.... Þetta þýðir bara að annað hvort er ég með læknaveikina á háu stigi, (sem væri fýsilegri kostur) eða að ég get farið að bíða eftir útbrotum á næstu dögum.

Harkan!!

2004-08-09T06:52:00.000Z

Ég tók mig til á laugardeginum þrátt fyrir smá veikindi daginn áður og fór í lest upp til SanFran til að hitta Unu og Hrafnhildi eins planað hafði verið. Ég hafði að vísu ekki gist með þeim nóttina áður því ég var bara að reyna að láta mér batna.

Ég var alvarlega farin að íhuga hvort ég væri að veikjast aftur í lestinni og hvort þetta hefði kannski ekki verið svo góð hugmynd að fara. Ég var þó fljót að gleyma því að mér liði illa þegar gamall maður, um 90ára settist við hliðina á mér og fór að spjalla. Ég komst semsagt að því að hann væri gallharður repóblikani sem kysi aldrei vinningsliðin, þ.e. hann kaus ekki Bush í seinustu kosingum og ætlar ekki að gera það næst. (Ekki það að ég sé að gera ráð fyrir að Bush vinni:))
Maðurinn byrjaði rólega í umræðum... eintalinu... og mér var eiginlega sama, ég er ekki mikið inni í pólitíkinni hér og var ekkert að fara að rökræða um hana.
Maðurinn var á móti fóstureyðingum og með stríði, honum fannst að USA ætti að hætta að versla við Spánverja því þeir hefðu dregið hermenn sína frá Írak. Það sýndi sko ekkert annað en ragmennsku og heimsku.
Svo fór maðurinn aðeins að sækja í sig veðrið og sagði að í háþróuðu iðnsamfélagi ættu menn að vera nógu menntaðir til að geta hafnað mönnum eins og Michael Moore. Democratar væru menn sem hefðu verið heilaþvegnir og sökudólgarnir væru sko kennararnir.
Hann fór meira að segja út í kommúnistana og hvað það væri nú vitlaus hugsjón. Ég hélt ég væri rósalega sniðug og sagði honum að hann afi minn væri nú kommúnisti. "Jájá, þeir voru hugsjónarmenn með markmið."
Ég: "Já, þeir áttu sér draum."
Maður: "Nei! Það er búllsjitt!!!"
Þá hafði ég greinilega opnað fyrir aðra gátt því nú fékk ég ræðuna yfir heimsku kommúnista, Kúpu og Rússland og að sjálfsögðu hvað Ameríkanar væru nú góðir, þeir væru að hjálpa öðrum þjóðum að komast af eins og t.d. Rússlandi.
Alla ræðuna endaði hann svo á rúsínunni í pylsuendanum; ég væri ung, menntuð og greind stúlka sem hefði sko vit á því að kjósa repóblikana.
Þetta var án efa indæll maður með sínar skoðanir sem ég virði en ég átti mjög erfitt með að hemja mig á að hlusta með opnum huga og sérstaklega að kyngja rúsínunni...

Ég hitti stelpurnar svo uppi á hóteli. Við skimuðum herbergið og vorum bara nokkuð sáttar. Því næst lá leið niður í bæ í göngutúr, út að borða og að lokum út að djamma. Við pikkuðum að sjálfsögðu upp gaura til að borga drykkina okkar og sýna okkur bestu staðina.
Kvöldið heppnaðist eins vel og hægt hefði verið, allir ánægðir við bara hefðum ekki getað skemmt okkur betur.

Daginn eftir splittuðumst við í safnaskoðun annarsvegar og verslunarleiðangur hinsvegar. Ég fór bara snemma heim enda dauðþreytt og svaf og svaf.
Takk, takk stelpur fyrir frábæra helgi!!

vittu rétta mér tittsjú?

2004-08-06T18:02:00.000Z

Við Anna Sólrún erum tvær veikar skvísur. Við erum með leikskólapest. Snilld... eða þannig.
Ég er greinilega ekkert með betri varnir gegn leikskólapestum kana-barnanna heldur en Anna.

Af vinnumálunum mínum er það að frétta að ég á eitt viðtal þegar ég kem heim og önnur er í skönnun. Af hinum veit ég ekkert nema þeim sem ég fékk nei við:)
Svo var ég að frétta það fyrst í dag að Almar er ekki lengur veitingastjóri á PizzaHut þannig að ég er búin að vera að beina fullt af fólki á vitlausan stað... Ekki gott. Helgi er nýi veitingastjórinn og hann er reyndar alveg meira en tilbúinn að mæla með mér. Það þýðir bara að ég þarf að breyta ferilskránni.
Vona að þetta virki ekki eins og ég sé að ljúga á ferilskránni minni... Ekki að þetta væri beint góð lygi;)

Dúdúrúdúdú

2004-08-04T20:21:00.000Z

Anna er byrjuð að vera ein í leikskólanum. Þessa vikuna verður hún í ca. 2tíma á dag og næstu viku 3tíma. Það er fín aðlögun held ég:)
Við sjáum reyndar til hvort hún mæti á hverjum degi því það er víst algengt að þau veikist mikið fyrstu dagana.

Ég tók mig til núna á mánudaginn og sendi ferilskrána mína út um allt. Sendi á öll fyrirtæki sem mér datt í hug og get hugsað mér að vinna hjá og á þrjár net-atvinnumiðlanir.
Það er alveg merkilegt hvað fyrirtækin geta verið dugleg að svara, ég átti eiginlega ekki von á því. Sum svörin eru einfaldlega þau að fyrirtækið sé ekkert að ráða í augnablikinu en ég hef fengið eitt boð um "viðtal" ...eða þannig. Ég var allavega beðin að koma að spjalla við hann þegar ég kæmi til landsins.
Það ætti að veita á gott... Eða ég vona það allavega:)

Myndavélar

2004-08-03T06:30:00.000Z

Seinasti dagurinn í dag hjá Önnu í aðlögun. Núna fær hún bara að bjarga sér sjálf á morgun. Anna litla verður skilin eftir ein í leikskólanum. Ohhh, hvað þetta vex úr grasi;)

Út í allt annað:
Skrítið hvað maður er alltaf óánægður með video-myndir af sér. Kannski er það bara ég en mér finnst alltaf óþægilegt að horfa á sjálfa mig á video. Þegar ég líka er svona meðvituð um það núna þá að sjálfsögðu haga ég mér eins og hálfviti um leið og myndavélin er sett af stað. Því get ég svo séð eftir þegar ég skoða video-ið... Ég get líka séð eftir að hafa látið eins og asni þegar ég vissi ekki að verið var að taka!!! Urrrrr! Hrefnu verður seint fyrirgefið fyrir afmælisgjöfina sem hún gaf Finni!!!

Thank god for the internet!!

2004-08-01T07:33:00.000Z

Veislan gekk með afbrigðum vel og allir virtust skemmta sér og vera sáttir (allavega hvort við annað).
Skemmtilegasta var þegar Stanford fólkið tók sig til og söng afmælissönginn á íslensku. Auk þess sem þau sögðu vel valin orð (á íslensku). Einhverra hluta vegna vildu þau ekki greina frá hvaðan þær heimildir væru komnar en með extra útsjónarsemi okkar komumst við að því að þýðingar og leiðbeiningar komu frá Hólmfríði og Óla... Ekki alveg fólkinu sem treystandi er fyrir svona. Þýðingar og framburðarsýningar komust til skila með hjálp e-mail og mp3.
Þeim tókst að koma þessu öllu nokkuð skammarlegu frá sér en samt verð ég að viðurkenna að ég missti mig af hlátri þegar þau sungu: "Hann varð þrítugur í gær". Þrítugur hljómaði eitthvað eins og "trrrrídrugrrr". Versta var að ég hélt á video-kamerunni, sjáum til hversu hrist (af hlátri) þetta verður.
Hér eru nokkrar af þýðingum Hólmfríðar og Óla:

Til hamingju með afmælið Finnur þýðing Rétt:)
Voðalega líturu illa út! - You look good!
Ertu búinn að panta pláss á elliheimili? - Ótrúlegt en satt þá var þar rétt þýðing:)
Eigðu undirförult og eigingjarnt líf - May you have a prosperous and a happy life.
Má ég strjúka nipplunni þinni? - Can I kiss you on the cheek?

Við afmæli undirbúa vera.

2004-07-31T17:10:00.000Z

Nú er að taka við ofurspíttaður afmælisundirbúningur. Við eigum eftir að gera helling!! Hvernig við förum að því veit ég ekki en sem betur fer er búið að seinka afmælinu til kl.5. Finnur er allur bæklaður með læsta öxl. Ég sótti hann einmitt snemma í vinnuna í gær því hann var orðinn svo ónýtur í öxlunum. Þetta verður afmæli með krambúleruðu afmælisbarni.

Helstu fréttir dagsins eru samt þær að Ragnheiður "litla" frænka mín er 14 ára í dag.... Ekkert svo lítil lengur, og hefur líklega ekki verið í svolítinn tíma. Ég meina hún er að ná mér í hæð!! Ohhh, ég verð að stækka... Hmmm eða eignast tímastoppara... Hvort ætli sé raunhæfara?....
Allavega, til hamingju með afmælið!!!!

María heimtaði Jón engar bækur lesið hafði

2004-07-31T06:27:00.000Z

Víííí!!! Ég keyrði út í vinnu til Finns í dag!! Ég er búin að vera frekar hrædd við að keyra í útlöndum og hef ekkert ýtt á að fá að keyra. Þetta gekk bara vel, umferðin er miklu rólegri hér en heima. Þrátt fyrir að ég hafi verið á hraðbrautinni í umferðarteppu. Enginn pirraður og allir að gefa öðrum séns... Nokkuð sem maður sér ekki heim... eða varla.

Þegar við Finnur komum heim var hérna stelpa komin sem er að læra málvísindi við MIT háskóla. Hún kom með könnun með sér sem tilraunadýrin eru annað hvort með íslensku eða sænsku að móðurmáli.
Könnunin er þannig að maður les setningu á íslensku og segir hvort hún gengur upp eða ekki. Mér hefði aldrei getað dottið í hug að það væri svona erfitt. Þetta eru allt svipaðar setningar með mismunandi orðaröð. Margar af setningunum geta alveg gengið upp en við myndum ekki nota þær eða jafnvel að þær gengju bara upp við sérstakar aðstæður.
Að lesa sömu orðin í mismunandi setningum 20 sinnum gerði mig ekkert smá ruglaða! Orðin "engum" og "bókum" missti algjörlega merkingu sína þannig að ég var farin að velta fyrir mér hvort þetta ætti í alvöru að vera skrifað svona. Það er mjög sérstakt að reyna að skilja samhengi á orðum sem virðast algjörlega hafa misst merkingu sína.

????

2004-07-30T02:30:00.000Z

Mmmmm, við erum að bíða eftir að maturinn eldist (ekki að hann verði eldri;)). Grillað nautakjöt, maísstönglar og salat (skorið af mér), mmmm. Ég er sko ógislega svöng.

Við Anna fórum í heimsókn nr.2 í leikskólann í dag. Þar hittum við nýja fóstru sem var alveg jafn frábær og hinar. Þær eru allar frekar hissa á að maður tali enski og spurja allar hvernig í ósköpunum ég hafi eiginlega lært þetta. Þeim finnst líka ekkert smá flott að á Íslandi skuli vera skylda að læra að minnsta kosti 2 önnur tungumál og flestir læra meira að segja þriðja!
Þessi nýjasta spurði mig skrítnustu spurningar sem ég hef fengið um ísland (fyrir utan pennavininn minn frá Alaska: "Búið þið í snjóhúsum?" VIÐ TÖLUÐUM SAMAN 'I GEGNUM NETIÐ!!!). Þessi fóstra spurði mig hvort það væru dagheimili á Íslandi... Hversu miklir fornaldarmenn halda þeir að við séum?

Ammli...

2004-07-29T18:14:00.000Z

Við Anna skrópuðum í leikskólanum í gær til að geta farið með Hrefnu, Unu og Baldri í IKEA:)
Dagurinn flaug og við vorum öll alveg þvílíkt dösuð eftir allt.

Anna Sólrún er með fjórar tennur eins og ég hef áður sagt, það fyndna er að í efri gómi eru það ekki framtennurnar heldur augntennurnar. Þannig að þegar Anna hlær þá sést í "víg"tennurnar hennar;) Ég er farin að kalla hana litlu vampíruna. Við tókum myndir af þessu sem ættu að koma á heimasíðuna hjá Finni og Hrefnu bráðlega... Eftir mánuð líklega;)

Finnur á afmæli í dag, hann er orðinn 30ára!!! Þannig að þetta er stórafmæli:) Hann ætlar að halda upp á það á laugardaginn, afmælisdaginn hennar Ragnheiðar frænku. Þá verður útiveisla. Fínt við útiveislur hér er að það þarf aldrei að hafa áhyggjur af veðrinu. Bara að það sé örugglega skuggi yfir grasinu;)

Kannski við séum merkileg þjóð þrátt fyrir allt;)

2004-07-28T07:10:00.000Z

Anna Sólrún fór í sína fyrstu heimsokn í leikskólann í dag, eða allavega alvöru heimsóknina þar sem hún fær að leika við krakkana. Henni fannst þetta alveg æði, sérstaklega að fara í göngutúr í 6krakka vagninum. Frekar fyndið fyrirbæri;) Ég var þvílíkt þreytt eftir þessa heimsókn andstætt Önnu sem hefur rétt tekið sér stutta lúra í dag, sem er slæmt fyrir mína fegrunarblundi;) Ástæðan fyrir svefnleysinu er líklega sú að hún er að taka tennur eins og brjálæðingur; 4tennur á tveimur vikum! Ekki eitthvað sem ég væri til í að standa í núna...

Annars gerði ég stórkostlega uppgötvun í kvöld. (Var að vísu búin að heyra um hana en var ekki búin að líta það eigin augum;)) Hér í USA er ákveðin dekkjaauglýsing sem gæti mögulega verið tekin á Íslandi en mikið fiffuð í tölvu. Það sem er líka skrítið við þessa auglýsingu er að bílstjórinn er sýndur í tveimur skotum og ótrúlegt en satt virðist hann vera Íslendingur og ekkert minni maður en Hilmir Snær Guðnason.
(Lesendur athugið að þetta eru ekki öruggar heimildir.)
Ég á þetta allt fest á spólu með Quantum Leap þáttum;)

Hvernig hljómar íslenska?

2004-07-27T02:37:00.000Z

Það er ótrúlegt hvað ég er spurð hérna þegar ég tala við aðra á íslensku: "What language is that you're speaking? French?" Svo þegar ég/við segjumst vera að tala íslensku: "Ohhh, wow! Iceland is green and Greenland is white?Is'nt it?"
Greinilegt að kanarnir hafa lært landafræðina sína einstaklega vel.
Mig langar samt að vita hvernig íslenskan hljómar fyrir utanað komandi. Ég hélt einhvern vegin að hún hljómaði meira eins og þýska eða eitthvað...

Girls night out

2004-07-25T23:43:00.000Z

Önnur stelpu-/djammhelgi. Hrafnhildur sótti mig á föstudeginum og við fórum samfó upp í Fremont til Unu þar sem við héldum létt stelpu-sleepover með margarítum og svona.
Við erum samt alveg ótrúlegar! Við fórum að versla daginn eftir, alveg slatta. Þetta var auðvitað allt nauðsynlegir hlutir sem við urðum að eignast. Samt keypti ég ekki sundbol og skó sem var eiginlega það sem ég ætlaði helst að kaupa;)
Við gistum allar heima hjá mér næsta kvöld til að djamma á campus. Við skemmtum okkur alveg geggjaðslega vel. Ég hét sko Una Eydís og var fædd 1975 (21árs aldurstakmark!). Þeir vildu eiginlega ekki hleypa mér inn á debetkortinu heldur vildur fá að sjá the real thing, passann minn. Ég náttúrulega orðin brjálæðislega æfð í að ljúga mig útúr svona (:p) og mér tókst í heilli setningu að koma orðunum Ísland og íslendingur 30 sinnum fyrir. Þeir hleyptu mér svo inn því ég gat borið nafnið fram;) Nokkuð gott!

Við hættum við garlic festivalið á sunnudeginum því við nenntum ekki að keyra í klukkutíma rétt til að kíkja. (Haaaa? Þunnar?!?! ) Við eyddum samt deginum saman í göngutúr um University ave. (Laugarvegur Stanfords). Allt voða fínt.
Ég þakka bara Unu og Hrafnhildi fyrir góða helgi, við hittumst vonandi bráðlega aftur:)

Við Anna erum svo bara einar og yfirgefnar núna því Finnur og Hrefna skruppu með Augusto í bíó og út að borða. *sniff*sniff* Alltaf jafn illa farið með okkur *sniff*sniff* ;)

Ohhh, ég er svo vond frænka;(

2004-07-23T06:40:00.000Z

Í dag fórum við Hrefna með Önnu í 6mánaðarskoðun (jebb, þó að hún sé 7mánaða;)). Eftir að Hrefna var búin að kenna hjúkkunni á vigtina (í alvöru!) og læknirinn búinn að hrósa Önnu hægri vinstri (hann var rosalega hrifinn af vinkinu hennar!! ;)) þá var komið að sprautunum. Ég hugsa að ég hafi verið stressaðri en Hrefna. Mér fannst þetta alveg agalegt! Að pína barnið svona:( Anna var sem betur fer fljót að gleyma að farin að brosa til okkar vonda fólksins. Versti parturinn var um kvöldið þegar hún fór að vera aum í lærunum (enda tvær sprautur í hvort læri). Þá máttum við sko ekki snerta hana. Ohhhh, aumingja krúsí, eða eins og Eyrún myndi segja: "Ohhhhh, litla keppakríli!!!" ;)

Annars er að koma helgi, þá er alltaf fjör:) Ég hugsa að ég fari og hitti óperurnar Unu og Hrafnhildi. Hrafnhildur ætlar að taka sér frí um helgina og hitta okkur. Svaka fjör!!

Börn-börn-börn

2004-07-22T17:26:00.000Z

Gærdagurinn var bara nokkuð fljótur að líða.
Ragga og Flóki komu á Stanford því Lára (mamma Flóka) var að kíkja á einhverjar rannsóknir hér.
Við Anna fórum á Stanford Shopping Center að hitta þau og svo gengum við heim til mín og fengum okkur að borða á Quiznos og kaffi á Starbucks.
Á Quiznos var okkur Röggu sagt að við værum rosalega heppnar að eiga svona falleg börn:) Hehe, maður er alveg hættur að nenna að leiðrétta fólk þannig að við sögðum bara takk.

Lára, Ragga og Flóki skutluðu mér svo upp í Fremont til Guðrúnar og Snorra þar sem ég passaði hann Baldur í gær. Þau Una voru að fara á tónleika með Train.
Baldur var bara ljúfur og góður þó honum þætti skrítið að hafa þessa manneskju eina að passa sig! (Baldur: "Hmmm, hún fylgir venjulega með henni ÖnnuSólrúnu! Hmmmm, skrítið!")
Ég gisti þar líka um nóttina og fékk svo far heim þegar þau fóru í vinnuna í morgun.
Kötturinn þeirra reyndi að láta mig fá hjartaáfall nokkrum sinnum um kvöldið/nóttina. Ég lá þá uppi í rúmi þegar eitthvað stórt og loðið stekkur upp í rúm til mín. Það þarf ekki mikið til að giska á að ég kipptist upp í öll skiptin. Kisa hætti þessu samt áður en að ég sofnaði. (Kisa: "Maður verður að fara vel að þessu mannfólki; það er svo viðkvæmt!")

Anna var að læra nýtt trix í dag. Hún er farin að vinka manni.
Hún tók upp á því allt í einu við matarborðið að brosa til mín og vinka mér. Ótrúlega dugleg!!!

Meira sund

2004-07-19T08:01:00.000Z

Eftir daginn í SanFran áttum við allar að taka sitthvora lestina til baka. Una var því miður svo óheppin að hún átti erfitt með að komast heim til sín því seinasta lestin sem fór beint til Fremont var löngu farin. Ákveðið var að Una færi bara með mér heim og gisti, sem gat ekki hentað mér betur. Málið var nefninlega að við þurftum að bíða í klukkutíma á lestarstöðinni og svo tók ferðin í lestinni annan klukkutíma. Frekar sorglegt því lestin mín fer á klukkutíma fresti á laugardögum nema 9 lestinni er sleppt og við komum ákúrat klukkan 9... Ekki gott. Ég var þannig mjög fegin að þurfa ekki að bíða ein í klukkutíma á lestarstöðinni.
Ragga var hinsvega mun óheppnari. Hún fór í vitlausa lest og endaði í Pleasanton sem er lengra frá SanFran heldur en frá SanFran heim til hennar. Hennar ferð tók ca. 2tíma þar sem hún fór til Pleasanton, tók aðra lest næstum alla leið til baka og aðra heim í Walnut creek. Hún hefði átt að vera ca. hálftíma á leiðinni.
Í raun endaði þetta þannig að við vorum allar þrjár á endastöðinni okkar á sama tíma.

Það að Una gisti hjá okkur var bara ennþá betri afsökun fyrir okkur Finn, Hrefnu og Önnu að koma í sundlaugina til þeirra Guðrúnar og Snorra. Þar sá ég Önnu í fyrsta sinn vera hrædda við vatnið, því um leið og við fórum ofan í fór hún að hágráta. Hún grét alveg lengi á eftir og það var mjög erfitt að róa hana. Líklega var þetta mest sjokk að fara svona úr hitanum í kalt vatn (virkaði kalt fyrst þegar maður kom úr steikjandi sólinni). Hún samt var rosalega óörugg mestan hluta meðan hún var ofaní. Allavega mun óöruggari en hún hafði verið í seinustu skiptin.
Við Finnur borðuðum þarna kvöldmat og spiluðum en Hrefna og AnnaSólrún stungu okkur af í stelpukvöld. Guðrún og Una voru svo svakalega góðar við okkur að þær skutluðu okkur heim eftir spil.

Af Önnu er það helst að frétta að hún fékk fyrstu tönnina núna á laugardeginum. Ég hef reyndar ekki séð hana ennþá því hún stingur alltaf tungunni út úr sér þegar ég er að reyna að kíkja. (Við skulum vona að hún sé ekki að ulla á mig;))

No lies, it's for beer.

2004-07-19T07:05:00.000Z

Helgin er bara búin að vera svo svakalega skemmtileg og svo mikið að gerast að ég hef hreinlega ekki komist til að skrifa... Ég veit varla hvernig ég á að byrja án þess að hafa þetta of langt:)

Sumir segja víst að mar eigi að byrja á byrjuninni... ;)
Helgin byrjaði á föstudagskvöldið þegar við Hrefna fórum með öðrum íslenskum konum til SanFran í saumó hjá henni Lottu. Saumaklúbburinn var alveg einstaklega vel heppnaður og skemmtilegur.
Þar sem að við Una og Ragga höfðum ákveðið að kíkja á borgina á laugardeginum fannst okkur sniðugast að gista þar um nóttina. Við vorum nú einu sinni allar komnar þangað og það tók því nú varla að fara heim og reyna svo að finna hver aðra daginn eftir.
Við höfðum því pantað okkur herbergi á tveggja stjörnu hóteli kvöldið áður og héldum þangað eftir saumóinn. Hótelið kom okkur bara skemmtilega á óvart, því það var eiginlega mun betra heldur en við áttum von á, án þess að vera svaka fannsí.

Þrátt fyrir gott herbergi og svona, héldumst við ekki lengur í herberginu en til ca. 2.
Við höfðum ekki verið upplýstari en svo að allir skemmtistaðir og barir loka einmitt kl.2! ...en það var allt í lagi, við hittum þarna eitthvað af fólki, þar á meðal norðmenn og svía sem við héngum með áður en við fórum heim á hótel að sofa.

Þrátt fyrir háleit markmið um að komast í morgunmatinn á hótelinu morguninn eftir þá fór það ekki svo. Við svefnpurkurnar sváfum til 10 (aðallega við Una því Ragga var andvaka frá því klukkan 6!!).
Frá SanFran ferðinni er erfitt að segja meira án þess að skrifa heila ritgerð! Hún var algjör stelpu-, dekurferð!!

Við fengum okkur að borða á stað sem heitir Pita pit (ótrúlega góður!! Er á Chestnut street ef einhver ætlar að borða í SanFran á næstunni;)). Við römbuðum reyndar ekki alveg á hann því þangað höfðum við farið með skandinövunum um nóttina og við ekki borðað en þeir látið mjög vel af. Við hittum á eigandann bæðu um nóttina og um morguninn. Hann að sjálfsögðu þekkti okkur, ég heyrði hann segja við afgreiðslustelpu "Some people even come 2 a day!" þegar við gengum inn... Hmmm;)

Við tókum daginn í borginni frekar random þrátt fyrir að hafa smá hugmynd um hvert við vildum fara og hvað við vildum sjá. Við römbuðum inn á fóta- og handsnyrtistofu eftir morgunmatinn og fengum hand- og fótsnyrtingu. (Ég fékk mér neglur, svaka pæja:))
Það sem við kíktum fleira á var Chestnut street (verslunargata) án þess að versla mikið, gengum eftir ströndinni þar sem við t.d. sáum yfir að Alcatraz fangelsinu og skýjaðri GoldenGate brúnni. Við ströndina var svo fullt af mörkuðum þar sem við létum aðeins ginnast yfir glingri og teiknuðum skopmyndum. Við kíktum einnig á vaxmyndasafn (stóðst ekki alveg væntingar en samt gaman) og fórum í kínahverfið. Í kínahverfinu enduðum við daginn á hálftíma nuddi sem var æðislegt! Við fórum allar út með vellíðunar glottið á andlitinu. Við hreinlega hefðum ekki getað endað daginn betur.

Í SanFran eins og öðrum stórborum er allt fullt af betlandi fólki. En þar sannast kenning Darwins um survival of the fittest.
Heimilisleysingjarnir eru farnir að bregða á það ráð að vera sem frumlegastir í peningabeiðninni og það virðist takast hjá þeim.
Við sáum tvo nokkuð góða, annar sat bara eins og margir aðrir með handskrifað spjald fyrir framan sig. Hjá honum hins vegar stóð: "No lies, it's for beer." Þetta svínvirkaði hjá karlinum sem fékk fullt af fólki til að gefa sér peninga.
Næsti á eftir, svona 3metrum frá var annar og á hans spjaldi stóð: "world famious bush man, give tips." Við vorum svo hissa á þessu að við stoppuðum aðeins til að sjá manninn. Hann sat á stól með tvær vel laufgaðar greinar fyrir framan sig. Þegar fólk svo gekk framhjá honum án þess að sjá hann rétti hann greinina og sagði "Búhh!!" til að bregða fólki. Þegar við höfðum stoppað tókum við allt í einu eftir að um hann hafi myndast stór áhorfendaskari sem bjó þó til göngustíg svo fólk kæmist framhjá. Svo var hlegið og hlegið í hvert sinn sem fólk öskraði upp yfir sig af hræðslu.

Verð... að... horfa...

2004-07-16T07:34:00.000Z

Ég er húkkt á bæði Quantum Leap og kúkkídó ís. Þetta er eiginlega sorglegt!! Annað fitar mig og hitt gerir mig lata. Saman er þetta einstaklega sterkt stöff! :)
Guðrún, Snorri, Una og Baldur komu í kvöld færandi hendi, fullt af pizzum og jarðarberjum, mmmmmhhh. (Fitandi hvað?!?!)

Fyrr um daginn kom hann Daníel Andri aftur í heimsókn til okkar, ég er ekki frá því að Anna hafi verið hálf abbó þegar ég hélt á honum:) Svona er maður merkilegur;) Hún var samt endalaust ánægð að hafa hann. Daníel Andri leit öðru hvoru á hana og brosti en Anna Sólrún skríkti og skríkti:)

Á morgun er svo saumó hjá Lottu í SanFrancisco (lesist með ammerískum hreim: Seeeen freeen'siskó). Við Una og Ragga (Rannveig) ætlum að gista niður í borg á hóteli til að byrja borgarleiðangur okkar snemma á laugardeginum... og hver veit nema mar eyði penge;) Hmmmm

Leikfélagi! Vííí!!!

2004-07-15T07:04:00.000Z

AnnaSólrún fékk leikfélaga í dag. Hann Daníel Andri þeirra Berglindar og Styrmis ætlar að vera með okkur Önnu öðru hvoru. Hann var hjá okkur í dag í klukkutíma og ég held hreinlega að Anna hafi ekki misst brosið af andlitinu meðan hann var hér. Daníel Andri var alveg eins og ljós allan tímann þrátt fyrir að hafa þessa ókunnugu kerlingu (mig) að passa sig.
Það er gaman að hafa hann hérna líka, hann er rosalega þægur og Önnu finnst ekkert smá gaman að hafa annað barn að leika við, ekki alltaf sömu kerlingarnar á daginn, mamman og eldgamla aunt-in hennar, úff! (Þær eru sko á þrítugsaldrinum!!) Svo fæ ég líka auka pening... Ekki slæmt:)

Dagurinn gekk meira að segja svo vel upp að við Hrefna gátum báðar farið í sund. Fyrst ég og svo hún. Bæði til að einhver væri að passa Önnu og svo af því að við Hrefna notum báðar sama kortið (*hóst*hóst*).

Sarah og Augusto komu svo í mat, spil og The Daily Show sem í kvöld var reynar alveg ótrúlega góður þáttur! Alveg óendanlega fyndinn.

Fjölgun

2004-07-15T01:31:00.000Z

Ég var að frétta að hún Máney, fyrrverandi bekkjarsystir mín (4. og 5. bekkur) var að eignast stelpu á sunnudaginn. Hún er meira að segja búin að nefna hana. Stelpan heitir Steinunn Vala. Ég gæti ekki verið meira montin. Þó ég verði að viðurkenna að ég á að sjálfsögðu ekkert í nafninu:)
Ég er að vísu búin að óska henni til hamingju en ég geri það bara aftur hér:)

$$$$$

2004-07-14T07:05:00.000Z

Eftir að Hrefna kom frá tannsa í dag skruppum við stelpurnar í bæinn enda vorum við með bílinn. Fyrsta var að sækja video-ið í viðgerð. Sem betur fer fyrir mig því ekki get ég verið að senda spólur út og suður í fóstur til að taka upp Quantum Leap;) Að maður tali ekki um þættina sem ég var búin að láta taka upp fyrir mig á átti eftir að sjá... Úff! Hvernig hefði eiginlega farið fyrir mér?!?!

Eftir video-leiðangurinn okkar skruppum við í Great mall. Hvernig eiga tvær stelpur að lifa af lífið í Bandaríkjunum án þess að vera búnar að versla í meira en mánuð?!?! Ég segi nú bara eftir þessa ferð að ég er fegin að ég byrjaði ekki fyrr! Núna langar mig bara að versla áfram! Ég meina, halló, hverjum er ekki sama um þessa dollara? Það á bara að eyða þeim;)
Ég bíð bara eftir sjokkinu sem ég fæ á morgun þegar samviskubitið kemur yfir mig. Ég hefði ekki átt að eyða svona miklu í Guess! Það er allt of dýr búð.... Svona miðað við hitt allavega (kannski ekki Ísland).

Btw Hanna, ég er búin að finna chilli's, nú á ég bara eftir að fara þangað;)

Smáþjóð

2004-07-12T07:44:00.000Z

Mér hefur alltaf þótt gaman að segja við útlendinga þar sem ég kem, að ég sé íslensk. Ég er svakalega stolt af því og finnst ég vera ekkert smá merkileg. Það er að sjálfsögðu af því að Ísland og þjóð eru svo svakalega merkileg!
Ég hef heyrt fólk tala mikið um einmitt þetta. Það að við, þessi pínulitla smáþjóð lengst út í Atlantshafi skulum finnast við vera svona svakalega merkileg. Það sé alveg furðulegt.
Fyrst núna þegar ég er búin að segja þrjúþúsund sinnum að ég sé frá eyjunni Íslandi og þar búi rétt undir 300.000 manns er ég allt í einu að fatta hvað við erum í rauninni pínu oggu ponnsu lítil! Við náum ekki einu sinni upp í eina prósentu af mannsfjölda heimsins.
Það er hlægilegasta er að ég þurfti að fara út fyrir heimsálfuna til að fatta þetta;)

Ammli

2004-07-12T02:15:00.000Z

Við vöknuðum eldsnemma í morgun, fyrir 10! til að fara í afmæli hjá honum Flóka Fannari sem varð 1 árs í dag. Hitinn var aðeins meiri þar enda klukkutíma akstur frá okkur og þar af leiðandi klukkutíma akstri lengra frá ströndinni sem þýðir meiri hiti. Góð skýring hjá mér:) Við fundum okkur bara skugga, fengum rosalega góðan mat og höfðum það gott.
Við vorum þarna 3 af 4 íslenskum "óperum" á svæðinu sem ég veit um, ég, Una og Rannveig en hún er hjá Láru og Halldóri sem eru einmitt foreldrar Flóka afmælisbarns. Við óperurnar töluðum um að skreppa upp í SanFran að skoða okkur um kannski næstu helgi og fá Hrafnhildi, 4.óperuna með.
Eftir afmælið fórum við í heimsókn til Ágústar, Soffíu og fjölskyldu en þau bjuggu einmitt þarna rétt hjá. Eins gott að gera eins mikið úr ferðinni okkar fyrst við vorum komin svona langt. Þau búa í alveg rosalega stóru og flottu húsi, einmitt svona eins og í bíómyndunum;) (bara svona af því að öll mín þekking af Bandaríkjunum byggist á bíómyndunum.:)) Finnur og Hrefna voru búin að tala um að fara með mig þangað til að sýna mér brjálæðislega húsið þeirra og það stóðst alveg væntingar;).

Það er annars alveg ótrúlegt! Ferðin mín hér er bara hálfnuð! Skrítið hvað manni finnst maður alltaf vera nýkominn. En ég meina, how time flies when you're having fun! ;)

Rússí-Kyrrahaf

2004-07-11T04:17:00.000Z

Við Finnur skruppum á stöndina í dag, ekki til að liggja mikið í sólbaði heldur bara svona að kíkja... á rússíbanana;) Við vorum rosalega óþekk og stálumst til að taka videomyndir á ferð. Ég er að vísu ekki búin að skoða en ég heyrði mig öskra út í eitt meðan Finnur var að skoða áðan:)
Tækin voru alveg við ströndina, næstum á henni. Við stóðumst það þess vegna ekki að dippa tánni útí Kyrrahafið... víííí:)
Eftir að hafa nært okkur aðeins héldum við heim. Við lentum að vísu í smá umferðarteppu og vorum lengur á leiðinni en við ætluðum en það var allt í lagi:) Við höfðum fullt af tónlist með og svona.
Núna erum við að bíða eftir henni Söruh sem ætlar að horfa á Iceage með okkur, hún er bara hálf manneskja þessa daganna án Augusto síns og veit ekkert hvað hún á af sér að gera.

Mushrooms...

2004-07-10T06:55:00.000Z

Dagurinn í dag var bara nokkuð viðburðaríkur. Meðan Hrefna var á fundi og Anna svaf beið ég eftir að barnalæknirinn myndi hringja. Anna var nefninlega komin með hvíta díla á tunguna sem við (læknaleysingjarnir) greindum sem sveppasýkingu. Meðan ég beið eftir að síminn hringdi fór ég að spá í hvað sveppasýking væri á ensku... hmmm... bíðum nú við... hvað eru sveppir? hmmm... mushrooms... Læknirinn hringdi ekki áður en Hrefna kom heim þannig að ég fékk ekki að nota mushroom kenninguna mína, en þrátt fyrir það tókst mér að skemmta sjálfri mér með því að ímynda mér samtal við lækninn þar sem ég segði: "Yes, she has these white spots on her tongue... Could be mushrooms"
Híhíhíhí... Ég veit... simple mind;)
Við skruppum saman... hehe. Við skruppum stelpurnar niður í vinnu til Finns, bæði til að stela af honum bílnum (til að versla) og sýna Önnu. Vinnufélagar Finns voru búnir að kvarta yfir Önnu-leysinu. Málið er nefninlega að núna eftir að við fluttum á campus getur Hrefna gengið í skólann og þarf ekki bílinn jafn mikið, þar af leiðir (minnir mig á stæ.tíma í MR)hefur Anna ekkert heimsókt vinnuna hans Finns í mánuð.

Eftir vinnuheimsóknina fórum við beint á sjúkrahúsið. Læknirinn vildi fá að kíkja á blettina hennar Önnu áður en hún fengi sveppalyf. Ég, simple minded íslendingurinn, skemmti mér mikið yfir því þegar við vorum beðnar um eftirnöfnin okkar, fyrst til að fá visitor passa og svo þegar læknirinn kom inn. Honum fannst ekkert smá töff að þetta væri íslenska.
Þetta er svolítið skemmtilegt ferli svona á háskóla spítala (Stanford spítali) en líka frekar hægvirkt. Málið er að fyrst fáum við inn til okkar læknanema sem tékkar á öllu og svo fer læknaneminn og ráðfærir sig við lækni sem kemur inn og tékkar á öllu svona til að vera viss.
Við vörðum deginum að mestu leyti á sjúkrahúsinu í stað þess að versla; hálftíma að bíða eftir læknanemanum og svo hálftíma eftir lækninum. Ætli neminn og læknirinn hefi ekki notað þennan hálftíma til að reyna að finna út hvernig ætti að bera þetta skrítna eftirnafn fram; Finnsdóttir. Það fyrsta sem læknirinn sagði þegar hann kom inn var: "Hvernig í ósköpunum berið þið þetta nafn fram? Er þetta íslenska????"
Við útskýrðum fyrir honum að við værum Finnsdottir, Gunnarsdottir og Thorarinsdottir og svo hvernig þetta kerfi virkaði.
Ég meina, halló! Hvað er svona erfitt við Thorarinsdottir... ;) :p
Það þarf lítið til að gleðja simple minds eins og mig:)

By the way, ég mæli eindregið með japönskum mat. Hann er æði... Algjört möst að reyna að borða með prjónum;)

Settles og ís;)

2004-07-09T06:42:00.000Z

Í kvöld fórum við til Guðrúnar og Snorra í mat... Í þetta sinn komum við með take away mat með okkur og eplapæ í eftir rétt. Allt smakkaðist mjög vel, eplapæið tvíbakaða líka:)
Okkur tókst sem sagt að brenna efri hlutann en Hrefna reddaði því með því að setja nýtt ofaná lag... Svo fengum við að sjálfsögðu ís með:)
Ótrúlegt en satt þá spiluðum við líka og í þetta sinn Settles, bæir og riddarar. Ég hafði aldrei spilað þá útgáfu áður en hún er bara rosalega góð. Mjög skemmtileg og góð framlenging á gamla Settles-inu þegar maður vill breyta til.
Guðrún og Snorri fóru um hálf 11 til að sækja Soffíu, Ágúst og fjölskyldu sem voru að koma úr 3ja vikna Íslandsferð.
Við héldum svo heim eftir hálftíma spilastopp því við urðum að sjálfsögðu að spila Sequence líka.
Anna Sólrún sem hafði neitað að sofa nema augnablik var glaðvakandi í bílnum og skemmti frænku sinni með því að humma með lögunum í útvarpinu... Mjög fyndið:)

Ísát og fleira

2004-07-08T08:26:00.000Z

Helstu fréttir héðan að handan eru þær að við metumst um hver okkar brýtur glös á sem skemmtilegasta hátt. Í augnablikinu á ég vinninginn; bæði er ég búin að brjóta flest glös og þar að auki slasa mig svo skemmtilega. Verðlaun mín hafa verið ís og meiri ís. Ég hreinlega man ekki eftir að hafa borðað eins mikinn ís á ævinni! Vð erum "húkkt" á cookie dough safeway ísnum, og ég er ekki að grínast. Ég man ekki eftir að hafa borðað ís svona marga daga í röð!

Af ekki svo góðum fréttum... fyrir mig. Vídeó tækið bilaði í seinustu viku og við fáum það ekki aftur fyrr en í næstu viku, sem væri allt í fína ef þeir hefðu ekki ákveðið að strumpa Quantum Leap þáttunum af á sem skemmstum tíma og sýna 8þætti í röð á föstudaginn... Allt þættir sem ég á ekki og hef aldrei séð en hefði annars tekið upp... Ég gæti gerst meiri sjónvarpssjúklingur en ég nú þegar er og vaknað klukkan 8 á föstudagsmorgninum og horft á sjónvarpið í 8tíma... Hmmm, ætli við reynum ekki frekar að fá einhvern til að taka þetta upp fyrir mig:)

Myndir!!

2004-07-06T00:10:00.000Z

Kvartandi fjölskyldumeðlimir mínir ættu nú að geta glaðst. Fyrstu myndir eftir að ég kom út eru komnar á síðuna hjá Finni og Hrefnu... Aðeins mánuði seinna;)

Afmæli

2004-07-05T19:04:00.001Z

Í dag á Vilborg afmæli, hún hefur loksins stigið yfir 20ára þröskuldinn:)
Allavega, til hamingju með afmælið Vilborg!! :)

Tölvan mín!!

2004-07-05T07:01:00.000Z

Fyrsta bloggið á tölvuna míííína!! Jaaaa, allavega tölvuna sem er í herberginu mínu. Núna erum við með eina tölvu á mann, tvær fastar og eina laptop. AnnaSólrún hefur að vísu enga tölvu en hún getur horft á sjónvarpið á meðan;)

Annars er ég búin að sofa mest allan daginn. Held ég hafi fengið sólsting í gær, er búin að vera með hausverk og vera flögurt í allan dag... Ekki gott. Þetta er annars að lagast.

Anna Sólrún fékk barnastól til að borða í. Einmitt það sem vantaði. Við létum hana vera í taubarnastól en það var eiginlega ekki nógu gott. Það varð að þvo stólinn í þvottavél reglulega enda stóllinn ekki beint gerður til mötunar:) Vorum búin að reyna róluna hennar líka, ekki alveg nógu sniðugt en mátti reyna:)

Sólarsteik

2004-07-04T18:56:00.000Z

Innihald:
Skemmtigarður.
Einn hópur fólks, stærð eftir þörfum.
Sólarvörn, ekki nauðsynleg fyrir steikina.

Aðferð:
Hópnum er komið fyrir í skemmtigarðinum. Sólarvörnin borin á eftir þörfum, því minna, því meira steikt.
Bakist í 8tíma.

Jebb, ég fór með Snorra, Unu og Sif í garðinn Great America. Þetta var "geeeeðkt" gaman. Við vorum þar í 8tíma og bárum að sjálfsögðu á okkur sólarvörnina öðru hverju. Þegar á leið daginn og fólkinu fór að fjölga... og fjölga... og fjölga vorum við gamla fólkið orðið óendanlega þreytt en Sif var þvílíkur stuðbolti ennþá og vildi helst vera áfram til lokunar.
Við fórum á endanum heim enda öll með hrista maga og hausa, og raðirnar búnar að lengjast þrefalt. Þetta var reyndar óvenju bissí dagur held ég vegna flugeldasýningarinnar um kvöldið í tilefni þjóðhátíðarinnar 4.júlí.
Heima, eldaði Finnur handa okkur dýrindis lax. Við systkinin stóðum okkur vel í því að kenna fólkinu að borða koktelsósu með laxinum. Það lagðist bara nokkuð vel í fólk.
Guðrún var þvílíkt heimilisleg og kom með heimagerða ferskjuköku, ferskjur úr garðinum. Það var alveg til að setja punktinn yfir i-ið.

Þegar við höfðum komið heim úr garðinum hafði ég uppgötvað rauðaflekki á öxlum og niður á bringu, aðeins aftan á baki. Ég hafði víst ekki verið alveg nógu dugleg að passa að endurnýjunar sólarvörnin færi alls staðar. Ég man þetta næst. Mér líður ágætlega núna, smá sviði við áxlirnar, annars allt að fara.
Ég ætti að fá annað tækifæri til að passa mig því það var einhver umræða um að fara aftur og í þetta sinn allir.

Svikahrappur

2004-07-03T06:54:00.000Z

Ég lét loksins til leiðast og reyndi að svindla mér í Stanford laugina. Það gekk bara vel, ekkert mál að komast inn. Ég er alls ekki í neinu formi en ég hef allavega nokkra daga í viðbót í sundinu. Mig minnir að það sé 14.júlí sem sundlaugin verði að mestu notuð undir æfingar fyrir ólympíuleikana. Þá mun fækka tækifærunum fyrir óþjálfandi einstaklingana að synda... Eins gott að ofnýta þetta þangað til;)

Kaffi!!!

2004-07-02T23:33:00.000Z

Þar sem Finnur og Hrefna drekka ekki kaffi og vilja ekki sjá kaffivél í sínu húsi;) erum við Anna Sólrún búnar að uppgötva Starbucks.... Ummmmmm, koffín!!!! Fín afsökun fyrir að hreyfa sig úr sófanum;)

Grillveisla;)

2004-07-02T19:03:00.000Z

Jebb, við vorum í grillveislu í gær:) Við fórum í mat til Guðrúnar og Snorra. Eitt af þessum matarboðum þar sem við sjáum um mat og þau um húsnæði... og aðeins meira rauðvín heldur en við komum með;) Þið sem hafið heyrt um Köben ferðina vitið hvað ég meina, þið sem voruð þar... vitið hvernig mér líður í dag:)
Við spiluðum öll langt fram eftir kvöldi, Guðrún, Snorri, Una, Sif og við(F+H+S).
Þetta var endalaust fjör, bæði Fimbulfamb og Sequence. Ótrúlegt en satt þá var þrítefli, tvisvar (3lið;)). Ég veit ekki hvort þetta á að vera hægt, ég meina hver eru líkurnar á því? (",) ;)
Annars eru Snorri, Una og Sif að hugsa um að taka mig með í Great America á laugardaginn. Það held ég að verði fjör:)

Af Önnu Sólrúnu er allt gott að frétta fyrir utan að hún er búin að vera eitthvað veik í maganum. Læknirinn greindi hana í gegnum síma, og sagði að hún væri líklegast með vírus í maganum. Það er eitthvað búið að vera að ganga. Hún virðist þó öll vera að lagast, svona smátt og smátt, sefur betur og svona:) Það er víst mest lítið sem hægt er að gera við svona vírusum, bara bíða og passa að hún drekki nóg. :)

Neyðarkall!!

2004-06-30T07:14:00.000Z

Lakkrísinn okkar er búinn!!!

Ring ring!!

2004-06-29T22:00:00.000Z

Ég fékk símhringingu í gær úr númeri sem ég þekkti ekki en var greinilega einhverstaðar héðan nálægt. Þegar ég svaraði heyrðist hinu megin: " (hik) uhhh, hvem er det?" með noskum hreim.
Mér þykir nú bara nokkuð gott að hringja í vitlaust númer í USA, tala norsku og hitta á manneskju sem skilur:)

Frídagar

2004-06-28T19:26:00.000Z

Ég var að komast að því að Bandaríkjamenn eru alveg einstaklega sniðugir þegar kemur að frídögum. Sem dæmi má taka að núna lendir 4.júlí á sunnudegi. (4.júlí=þjóðhátíðardagur U.S.A) Margir myndu þá hugsa: "ææææi, nei þá er ekki auka frídagur!" En neeeei, þeir eru svo sniðugir hér að þeir færa frídaginn bara. Þannig að núna á föstudaginn er 4.júlí-frídagur hjá vinnandi fólki því það má að sjálfsögðu ekki mismuna frídögum;)
Ég legg til að við gerum það sama heima, með 17.júní og aðra daga, s.s. páskadag, jól, að ógleymdum öðrum í jólum o.s.frv. Rúsínan í pylsuendanum eru svo auðvitað hvítasunna og pálmasunnudagur... ;)

Allt við það sama:)

2004-06-28T07:38:00.000Z

Þetta er allt að verða heimilislegra og heimilislegra hérna hjá okkur, í dag settum við saman tölvuborðið sem við keyptum í gær í IKEA. Það var að sjálfsögðu sett upp inni hjá mér... Maður býr ekki hjá tölvunarfræðingi án þess að allir (eldri en 6mánaða) fái sína tölvu. :)
Þar að auki voru settar upp gardínustangir, gardínur og að sjálfsögðu hengdar upp myndir. Þetta tókst okkur allt áður en við stukkum út í bíl til Söruh sem kom að sækja okkur í grillveislu.

Við ættum núna að fara að geta haldið almennilegar grillveislur hér líka því Jónína og Eggert vinafólk Finns og Hrefnu eru að flytja heim til Íslands og gáfu þeim grill... Ég má nú ekki gleyma örbylgjuofninum sem þau gáfu þeim líka og hjólið. Einmitt það sem vantaði hérna. :)

Annars er ég ekki á leiðinni til Norge í haust. Ef einhver getur komið með alveg rosalega sniðuga hugmynd um hvað ég á að gera í haust endilega komið með hana. Ég er svona að spá og spegulera. Er með ýmislegt í huga en veit samt ekki. Það eru svona upp og niður hliðar og svoleiðis:)

Just a regular swedish name... IKEA

2004-06-27T06:55:00.000Z

Við vorum að koma úr massívum mat hjá Guðrúnu og Snorra... I'm so "sad" I could "spring"! eða eins og sumir segja: "Hef ég nú borðaða yfir mig rétt einu sinni!" ;) taki það til sín sem eiga;)
Það er nú eiginlega það sem sýnir að lífið sé í föstum skorðum að við skulum fara í mat þangað;) (sjá blogg Hrefnu;)

Annars svona til að skýra nafnið á blogginu þá fórum við í IKEA í dag, þetta var bara eins og að vera heima. Það mátti sjá texta á sænsku og svona... Rosa heimilislega;)
Það kannski sannar það að ég horfi of mikið á sjónvarp og þá sérstaklega Friends að allan tímann í IKEA var ég með texta úr Friends-þáttunum: "...ohhh, just a regular swedish name... uhh IKEA..."
Þið Friends aðdáendur ættuð að skilja;)

6mánaða

2004-06-26T07:54:00.000Z

Anna Sólrún átti 6mánaða afmæli í dag, af því tilefni voru að sjálfsögðu teknar fullt af myndum af henni (ekki að það sé neitt nýtt:) Hún er orðin rosa stór. Við skruppum út á róló og hún rólaði sér meira að segja alveg sjálf... í barnarólunum sem eru hannaðar fyrir pínulitla krakka:) Henni fannst það rosalega gaman!

Ég kom líka að því í dag að ég er á réttum stað á réttum tíma; það á að fara að endursýna Quantum Leap þættina hér. Þeir byrja í næstu viku. Ef það eru einhverjir sjónvarpsþættir sem ég elska þá eru það þessir:) Það versta er að þeir eru að hugsa um að sýna þá kl.2 á næturnar...! Video tækið hér verður ofnotað takk fyrir:)

Við Finnur vorum að koma af Fahrenheit 9/11 rétt í þessu. Ég vil eiginlega ekki mikið tala um þessa mynd, en ég er mjög reið eftir hana...
...Ok, eitt: mér fannst í byrjun myndarinnar að Moore væri orðin það mikið á móti Bush að hann gæti ekki verið hlutlægur, enda ætlar hann sér örugglega ekki að vera það þegar svo líður á myndina er erfitt að reiðast ekki...
...ég get bara sagt eitt: Aldrei, aldrei aftur á ég eftir að geta hlustað á lagið The Roof is on Fire...